Āmoho 3 - Maori Bible 2012(MRI2012)

Te Kaniawhea me te Whakawhiunga o Īharaira

1Whakarongo ki tēnei kupu i kōrerotia e Ihowā mō koutou, e ngā tama a Īharaira, mō te hapū katoa i kawea mai e ahau i te whenua o Īhipa, i mea ahau:

2“Ko koutou anake tāku i mōhio ai

o ngā hapū katoa o te ao.

Mō reira ka whiua koutou e ahau

mō ō koutou hē katoa.”

3E haere tahi anō rānei te tokorua,

ki te kore e whakaae ki a rāua?

4E hāmama rānei te raiona i te ngahere

i te mea kāhore āna tūpāpaku?

E tangi rānei te reo o te kūao raiona i tōna kuhunga,

ki te kore tētahi mea e mau i a ia?

5E taka rānei te manu ki roto ki te māhanga i runga i te whenua

i te mea kāhore he āhere mōna?

E mokowhiti ake rānei te māhanga i te oneone,

ā, hore rawa he mea e mau?

6E tangi rānei te tētere i roto i tētahi pā,

ā, kāhore te iwi e wehi?

E puta rānei he kino ki te pā,

ā, ehara i a Ihowā nāna i mahi?

7He pono e kore te Ariki, a Ihowā, e mahi i tētahi mea,

engari ka whakakitea e ia tōna whakaaro huna

ki āna pononga, ki ngā poropiti.

8Kua hāmama te raiona;

ko wai e kore e wehi?

Kua kōrero a Ihowā, te Ariki;

ko wai e kore e poropiti?

Te Turakitanga o Hamaria

9Pānuitia atu i roto i ngā whare kīngi i Aharoro,

i ngā whare kīngi hoki i te whenua o Īhipa,

mea atu, “Whakamine i a koutou ki runga ki ngā maunga o Hamaria,

ka mātakitaki ki ngā ngangau nui i waenga o reira,

ki ngā tūkinotanga hoki i waenga o reira.”

10“Kāhore hoki rātou e mōhio ki te mahi i te tika,” e ai tā Ihowā,

“e rongoā nei rātou i te mahi tutū me te pāhua i roto i ō rātou whare kīngi.”

11Mō reira ko te kupu tēnei a te Ariki, a Ihowā:

“He hoariri tērā, ka karapotia e ia te whenua;

ā, ka riro iho i a ia tōu kaha,

ka pāhuatia hoki ōu whare kīngi.”

12Ko te kupu tēnei a Ihowā:

“Ka rite ki te hēpara e tango mai nei i ngā waewae e rua i te māngai o te raiona,

i tētahi wāhi rānei o te taringa;

ka pēnā anō te tangohanga mai o ngā tama a Īharaira e noho rā i Hamaria

i te pito o te moenga,

i runga hoki i ngā urunga o tētahi moenga.”

13“Whakarongo koutou, whakaaturia hoki he hē mō te whare o Hākopa,” e ai tā te Ariki, tā Ihowā, tā te Atua o ngā mano.

14“Nō te mea hei te rā e pā ai tāku ki a Īharaira mō ōna poka kē,

ka pā anō hoki tāku ki ngā āta o Pētēre,

ā, ka pōutoa ngā haona o te āta,

ka taka ki te whenua.

15Ka patua anō e ahau te whare hōtoke

me te whare raumati;

ā, ka mōtī ngā whare rei,

ka kore ngā whare nunui,”

e ai tā Ihowā.