Hopa 15 - Maori Bible 2012(MRI2012)

Te Whakawhitinga Kōrero Tuarua(15.1–21.34)

1Nā, ka whakautua e Eripāta Temani, i mea ia:

2“He horihori kau koia te mātauranga e whakapuakina e te tangata whakaaro,

kia whakakīia e ia tōna kōpū ki te hau marangai?

3Me kōrero rānei ia ko ngā kupu kore hua hei ako,

ko ngā whaikōrero rānei kāhore nei e whai tikanga?

4Āe, kua whakakorea atu nā e koe te wehi,

kei te pupuri mai koe i te īnoi i te aroaro o te Atua.

5Nā, kei te whakaakona tōu māngai e tōu kino,

ā, kei te whiriwhiria e koe ko te arero o te hunga tinihanga.

6Ehara i ahau, nā tōu māngai anō i hopu tōu kino;

ko ōu ngutu anō hei whakaatu i tōu hē.

7“Ko koe ianei te tangata tuatahi kua whānau?

He mea hanga rānei koe nō mua atu i ngā pukepuke?

8Kua rongo rānei koe i tō te Atua whakaaro puku?

Kei te kaiponu rānei koe i te whakaaro ki a koe anake?

9Ko te aha te mōhiotia ana e koe, ā, kāhore e mōhiotia e mātou?

Ko tēhea whakaaro anō hoki ōu kāhore nei i a mātou?

10Kei a mātou ngā upoko hina rātou tahi ko ngā tino koroheke,

kaumātua rawa ake i tōu pāpā.

11He iti rawa rānei mōu ngā whakamārie a te Atua,

te kupu ngāwari e hoatu ana ki a koe?

12He aha koe i kāhakina atu ai e tōu ngākau?

He aha hoki ōu kanohi i kimokimo ai,

13i tahuri ai tōu wairua ki te whakahē i te Atua,

i puaki ai ēnā kupu i tōu māngai?

14“He aha te tangata, e mā ai ia,

te whānau rānei a te wahine, e tika ai?

15Nanā, kāhore ia e whakawhirinaki ki āna mea tapu;

kāhore hoki ngā rangi e mā ki tāna titiro.

16Kātahi ia te hē rawa ko te mea whakarihariha,

ko te mea poke, ko te tangata e inu nei i te kino ānō he wai.

17“Māku e whakaatu ki a koe, whakarongo mai ki ahau;

ko te mea kua kitea e ahau, māku e kōrero atu –

18he mea kōrero mai nā ngā mōhio,

he whakarerenga iho nā ō rātou mātua;

kīhai hoki i hunā e rātou,

19ki a rātou nei anake te hōmaitanga o te whenua;

kīhai hoki te tangata kē i tika i waenganui i a rātou.

20E whakamamae ana te tangata kino i ōna rā katoa,

arā i te maha o ngā tau e haupū nei mō te kaitūkino.

21He reo whakawehi kei roto i ōna taringa;

i te wā whai rawa ka tae mai te kaipāhua ki a ia.

22Kāhore āna whakaaetanga ake tērā ia ka hoki ake i te pōuri,

e whanga ana anō hoki te hoari ki a ia.

23E kōpikopiko noa ana ia ki te taro māna,

e mea ana, ‘Kei hea rā?’

E mōhio ana ia kua tata ki tōna ringa te rā o te pōuri.

24Ko te ngākau mamae, me te tūmatatenga, hei whakawehi i a ia;

ka kaha ake rāua i a ia,

me te mea he kīngi kua rite ana mea mō te whawhai.

25Kua totoro nei ōna ringa ki te whawhai ki te Atua,

kua whakatoatoa nei i a ia ki te whawhai ki te Kaha Rawa;

26kua rere ki a ia me te kakī mārō,

me ngā puku mātotoru o āna whakangungu rākau.

27“Kua kōpakina hoki tōna mata e tōna ngako,

ā, kua tupu te ngako o tōna hope.

28Nā, i noho ia ki ngā pā mahue,

ki ngā whare kāhore i nohoia e te tangata,

meāke nei waiho hei pūranga.

29E kore ia e whai taonga, e kore anō ōna rawa e mau,

e kore anō hoki tō rātou hua e tāupe ki te whenua.

30E kore ia e puta i te pōuri, ōna peka ka maroke i te mura,

ka riro atu anō ia i te manawa o tōna māngai.

31Kei whakawhirinaki ia ki te mea teka noa, kei tinihanga ki a ia anō;

nō te mea ko te teka noa hei utu ki a ia.

32E kore tōna rā e taea, kua rite;

e kore anō tōna peka e whai rau.

33Ka ruiruia e ia āna karepe kaiota ānō ko te wāina,

ā, ka makā tāna puāwai me te mea ko te ōriwa.

34Ka pakoko hoki te whakaminenga o te hunga atuakore,

ka pau hoki i te ahi ngā tēneti o ngā utu whakapati.

35He mahi nanakia te mea i hapū ki roto ki a rātou,

whānau ake he teka noa;

ko ō rātou kōpū anō hei hanga i te tinihanga.”