Hopa 31 - Maori Bible 2012(MRI2012)

1“Kua oti tāku kawenata ki ōku kanohi;

kia whakaaroaro ahau hei aha ki te kōtiro?

2He aha tā te Atua wāhi e tuwha mai ai i runga?

He aha tā te Kaha Rawa taonga tupu i te wāhi tiketike?

3He teka ianei he whakangaromanga mō te tangata kino,

he whiu mō ngā kaimahi o te hē?

4He teka ianei e kitea ana e ia ōku ara,

e taua ana e ia ōku hīkoinga katoa?

5“Ki te mea i haere ahau i runga i te tekateka noa,

ā, i hohoro tōku waewae ki te tinihanga –

6kia pāunatia ahau i runga i te pāuna tika,

kia mōhio ai te Atua ki tōku tapatahi –

7ki te mea i kotiti kē tōku hīkoinga i te ara,

ā, i whai tōku ngākau i ōku kanohi;

ā, ki te mea i mau te tongi ki ōku ringa;

8kāti, ko ahau hei whakatō, ā, mā tētahi atu e kai;

āe rā, tukua ngā hua o tāku māra kia hūtia atu.

9“Ki te mea i whakawairangitia tōku ngākau e te wahine,

ā, i whanga ahau i te tatau o tōku hoa;

10heoi kia huri parāoa tāku wahine mā tētahi atu,

kia piko iho anō hoki ngā tāngata kē ki runga i a ia.

11He kino rawa hoki tērā;

āe rā, he hē e tika ana kia whiua e ngā kaiwhakawā.

12He ahi hoki tērā e kai ana ki te whakangaromanga rawa,

poto noa āku hua katoa.

13“Ki te mea i whakahāweatia e ahau te whakawā

a tāku pononga tāne, a tāku pononga wahine,

i a rāua e totohe ana ki ahau;

14ka pēhea rā ahau ina whakatika te Atua?

He aha tāku kupu e whakahoki ai ki a ia ina tae mai ia ki te titiro?

15He teka rānei nā tōku kaihanga ia i hanga i roto i te kōpū?

Ā, nāna, nā te kotahi, i whai āhua ai māua i roto i te puku?

16“Ki te mea i kaiponuhia e ahau tā ngā rawakore i hiahia ai,

ā, meinga ana e ahau ngā kanohi o te pouaru kia pau i te minamina;

17ki te mea rānei i kainga tāku maramara e tōku kotahi,

ā, kīhai te pani i kai i tētahi wāhi –

18he mea whakatupu ia nāku nō tōku taitamarikitanga rā anō me te mea ko tōna pāpā ahau;

ko te pouaru he mea ārahi nāku nō te kōpū rā anō o tōku whaea –

19ki te mea i kite ahau i tētahi e tata ana ki te mate, he kore nō te kākahu,

ā, kāhore he uhi mō te rawakore;

20ki te mea kīhai tōna hope i whakapai ki ahau,

ā, kīhai ia i mahana i ngā huruhuru o tāku kāhui;

21ki te mea i ara tōku ringa hei pēhi i te pani,

i tōku kitenga he āwhina tērā mōku kei te kūwaha;

22nā, kia marere atu tōku pokohiwi i roto i te peke,

kia whati te tākakau o tōku ringa.

23Ko te whiu hoki a te Atua tāku i wehi ai;

kīhai hoki i taea e ahau te aha i tōna nui.

24“Ki te mea i ū tōku whakaaro ki te kōura,

ā, i mea ahau ki te kōura parakore,

‘Ko koe tāku e whakawhirinaki atu ai’;

25ki te mea i koa ahau ki te maha o ōku rawa,

ā, ki te nui o tā tōku ringa i whiwhi ai;

26ki te mea i kite ahau i te rā e whiti ana,

i te marama rānei e haere ana i tōna tīahotanga;

27ā, ka kūmea pukutia atu tōku ngākau,

ka kihia tōku ringa e tōku māngai;

28nā, he kino tēnei hei whiunga mā ngā kaiwhakawā:

he teka hoki nāku ki te Atua i runga.

29“Ki te mea i koa ahau ki te whakangaromanga o te tangata i kino ki ahau,

i whakaara ake rānei i ahau i te pānga o te hē ki a ia –

30āe, kīhai ahau i tuku i tōku māngai kia hara,

kīhai i whai kia kangā tōna wairua –

31ki te mea kāhore ngā tāngata o tōku tēneti i mea,

‘Tēnā koa te tangata kīhai nei i mākona i tōna kikokiko?’

32Kīhai te manene i moe i waho;

i whakatuwheratia anō e ahau ōku tatau ki te tangata haere;

33ki te mea i pērā ahau me Ārama, i hīpoki i ōku hē,

i huna i tōku kino ki roto ki tōku uma;

34i wehi hoki ahau i te huihui nui,

i mataku ki te whakahāwea a ngā hapū,

ā, whakarongo kau ana, kīhai hoki i puta ki waho –

35auē, me i whakarongo mai tētahi ki ahau!

Nanā, tēnei tāku tohu, mā te Kaha Rawa e whakahoki mai he kupu ki ahau!

Me i ahau noa te pukapuka i tuhituhia e tōku hoariri!

36Inā, kua amohia e ahau i runga i tōku pokohiwi;

kua herea e ahau hei karauna mōku.

37Kua whakaaturia e ahau ki a ia te maha o ōku hīkoinga;

rite tonu ki tā te rangatira tāku whakatata atu ki a ia.

38“Ki te tangi tāku oneone, he whakahē ki ahau,

ki te uru anō ōna moa ki te auē,

39ki te mea i kainga e ahau ōna hua he mea kīhai i utua,

ā, nāku rānei ōna ariki i mate ai,

40nā, kia riro pū te wīti i te tātarāmoa,

te pārei i te taru kino.”

Heoi anō ngā kōrero a Hopa.