Ihāia 33 - Maori Bible 2012(MRI2012)

He Poropititanga mō te Whakaoranga i ngā Hoariri

1Auē te mate mōu e pāhua nei,

ā, kīhai koe i pāhuatia;

e tinihanga nei,

ā, kīhai anō koe i tinihangatia!

Kia mutu tāu pāhua,

ka pāhuatia anō koe;

kia mutu tāu tinihanga,

ka tinihangatia koe.

2Kia atawhai, e Ihowā, ki a mātou;

kua tatari nei mātou ki a koe.

Ko koe hei ringa mō rātou i tēnei ata, i tēnei ata,

hei whakaora mō mātou i ngā wā o te raru.

3I te rongonga i te ngangau, whati ana ngā iwi;

i tōu aranga ki runga, marara ana ngā iwi.

4Ko te kohikohinga o ō koutou taonga ānō he moka e kohi ana;

kei te tarapeke o te māwhitiwhiti te rite ina kōkiritia e rātou.

5Ka whakanuia a Ihowā; kei runga hoki tōna nohoanga;

nāna a Hiona i kī ai i te whakawā, i te tika;

6ā, ka ū ngā wā i a koe;

hua tonu te whakaora, te whakaaro nui, te mātauranga;

ko te wehi ki a Ihowā hei taonga mōna.

7Nanā, he tangi ō rātou māia i waho;

ko ngā karere hohou rongo,

tīwerawera ana te tangi.

8Kua ururuatia ngā ara,

kua kore e haerea e te tangata.

Kua paheke i a ia te kawenata,

whakahāwea ana ia ki ngā pā;

kāhore te tangata e whakaaroa e ia.

9E tangi ana te whenua, ngohe noa iho;

kua whakamā a Repanōna, kua memenge;

a Harono, rite tonu ki te koraha;

ko ngā rau o Pahana, o Karamere, ruirui rawa.

10“Kātahi ahau ka whakatika,” e ai tā Ihowā;

“kātahi ahau ka whakarewa ake i ahau,

kātahi ahau ka neke ake.

11Ko tō koutou hapū he pāpapa,

whānau ake he kakau wīti;

ko tō koutou manawa, ka rite ki te ahi, ka kai i a koutou.

12Ka rite hoki ngā iwi ki ngā tahunga kotakota;

ki te tātarāmoa kua tapahia, e tahuna ana ki te ahi.”

13Whakarongo, e koutou o tawhiti ki tāku i mea ai;

e te hunga e tata ana, kia mōhio mai ki tōku kaha.

14Pawera noa iho ngā tāngata hara i Hiona,

mau pū te hunga atuakore i te tūiri.

“Ko wai o tātou e noho ki te ahi e kai ana?

Ko wai o tātou e noho ki ngā tahunga e kore nei e mutu?”

15Ko te tangata e haere ana i runga i te tika, he tika anō āna kōrero;

ko te tangata e whakahāwea ana ki ngā taonga o te tūkino,

e rukerukea ana e tōna ringa te utu whakapati;

e punia ana ōna taringa kei rangona he kōrero toto,

e whakamoe ana i ōna kanohi kei kite i te kino;

16ko te nohoanga mō tērā kei runga rawa;

ko tōna wāhi ārai riri ko ngā kaha o ngā kāmaka;

ka hōmai he taro māna,

ka pūmau te wai mōna.

Te Whenua o te Kīngi Rangatira

17Ka kite ōu kanohi i te kīngi, i tōna ātaahua;

ka mātakitaki anō ki te whenua e hora mai ana i tawhiti.

18Ka whakaaroaroa te wehi e tōu ngākau:

“Kei hea te kaitatau?

Kei hea te kaipāuna takoha?

Kei hea te kaitatau o ngā pourewa?”

19E kore koe e kite i te iwi nanakia,

he hōhonu nei tō rātou reo, kāhore e rangona e koe;

he rerekē te reo, e kore e mātauria e koe.

20Titiro ki Hiona, ki te pā o ā tātou hākari;

ka kitea e ōu kanohi a Hiruhārama,

he nohoanga hūmārie, he tēneti, e kore e nekehia;

ā, kore tētahi o ōna titi e unuhia ā ake ake,

e kore anō tētahi o ōna taura e motu.

21Engari, ki reira a Ihowā ki a tātou me tōna nui,

hei wāhi mō ngā awa whānui mō ngā wai nunui;

kāhore hoki he waka e hoehoea ki reira,

kāhore he kaipuke nui e tika nā reira.

22Nō te mea ko Ihowā tō tātou kaiwhakawā,

ko Ihowā tō tātou kaiwhakatakoto tikanga,

ko Ihowā tō tātou kīngi;

māna tātou e whakaora.

23Kua tangoro kau ōu pūwhenua,

tē taea te tūranga o tō rātou rewa te whakaū,

tē taea te rā te whewhera.

Nā, nui atu te taonga parakete e wehewehea ana,

pāhuatia ana ngā taonga pārau e ngā kopa.

24Kāhore hoki he kīanga ake a te tangata whenua, “He mate tōku”;

ko te iwi e noho ana i reira, ka murua tō rātou hē.