Kenehi 49 - Maori Bible 2012(MRI2012)

I Manaakitia ngā Iwi Kotahi Tekau mā Rua o Īharaira e Hākopa

1Nā, ka karanga a Hākopa ki āna tamariki, ka mea, “Huihui mai, ā, ka kōrerotia e ahau ki a koutou ngā mea e pono ki a koutou i ngā rā ō muri.

2Huihui mai, whakarongo hoki, e ngā tama a Hākopa;

whakarongo hoki ki a Īharaira, ki tō koutou pāpā.

3“E Reupena, ko koe tāku mātāmua,

tōku pakaritanga, me te tīmatanga o tōku kaha;

te hiranga ake o te korōria, te hiranga ake hoki o te kaha.

4He mea pōkarekare, ānō he wai, e kore koe e kake;

mō tōu pikitanga i te moenga o tōu pāpā;

pōkea iho e koe a reira – i pikitia e ia tōku takotoranga!

5“He tuakana, he teina, a Himiona rāua ko Rīwai;

he rākau riri kino ā rāua hoari.

6Kaua e tomo, e tōku wairua, ki tō rāua rūnanga;

kaua e huihuia, e tōku korōria, ki tō rāua whakaminenga –

i patu tangata hoki rāua i a rāua e riri ana,

ā, he hīkaka nō rāua i kopa ai te kau.

7Kia kangā tō rāua riri, i kaha nei;

me tō rāua āritarita, nō te mea he nanakia!

Ka wehea atu rāua e ahau ki roto ki a Hākopa,

ka whakamararatia hoki rāua ki roto ki a Īharaira.

8“E Hūrā, ko koe e whakamoemititia e ōu tuākana, e ōu tēina;

ka ū tōu ringa ki te kakī o ōu hoariri;

ka piko ki a koe ngā tama a tōu pāpā.

9He kūao raiona a Hūrā;

i kake atu koe, e tāku tama, i te haenga.

I piko, i tāpapa ia, i pērā me te raiona,

i pērā hoki me te raiona kātua – mā wai ia e whakaoho?

10E kore e riro kē te hēpeta i a Hūrā,

me te tokotoko o te kāwana i waenganui o ōna waewae,

kia tae mai rā anō a Hiro;

ā, ka rongo ngā iwi katoa ki a ia.

11Ka herea e ia tana kūao ki te wāina,

te tama hoki a tana kāihe ki te wāina pai rawa;

ka horoia e ia ōna kākahu ki te wāina,

ōna weruweru hoki ki te toto o te karepe.

12Ka mumura hoki ōna kanohi i te wāina,

ka mā ōna niho i te waiū.

13“Ka noho a Hepurona ki te wahapū o te moana;

hei wahapū anō ia mō ngā kaipuke;

ka tutuki atu hoki tōna rohe ki Hairona.

14“He kāihe kaha a Ihākara,

e tāpapa ana i waenga o ngā moenga hipi e rua;

15ā, i tōna kitenga i te okiokinga he pai,

i te whenua hoki he āhuareka;

nā, ka tukua iho e ia tōna pokohiwi ki te pīkaunga,

ā, meinga ana ia hei pononga hōmai takoha.

16“Ka whakawā a Rāna i tōna iwi,

ka pērā ānō me tētahi o ngā iwi o Īharaira.

17Hei nākahi a Rāna ki te ara,

hei neke hoki ki te huarahi,

e ngau ai i te rekereke o te hōiho,

ā, ka taka whakamuri tōna kaieke.

18“Kua tatari atu ahau ki tāu whakaoranga, e Ihowā.

19“Ko Kara, ka āki te ope ki runga ki a ia;

otiia ka āki ia ki tō rātou rekereke.

20“Ko tā Āhera, ka mōmona tāna taro,

ā, he kai kīngi ōna hua.

21“Ko Napatari, he hāta kua tukua kia haere;

e hōmai ana e ia ngā kupu papai.

22“Ko Hōhepa he peka hua,

he peka hua i te taha o te puna;

e toro atu ana ōna manga ki tua o te taiepa.

23I whakatupu kino ngā kaikōpere i a ia,

i pere mai hoki, i kino hoki ki a ia.

24Otiia, i mau tāna kōpere i runga i te kaha,

ā, i whakapakaritia ngā tākakau o ōna ringa

e ngā ringa o te Mea Kaha o Hākopa,

nō reira nei te hēpara, te kāmaka o Īharaira,

25arā e te Atua o tōu pāpā, māna anō koe e āwhina;

e te Kaha Rawa hoki, māna e tuku mai ki a koe

ngā manaaki o te rangi i runga,

ngā manaaki hoki o te rire e takoto ana i raro,

ngā manaaki o ngā ū, o te kōpū hoki.

26Hira ake ngā manaaki a tōu pāpā

i ngā manaaki a ōku tūpuna,

tae atu ana ki tērā taha rawa o ngā pukepuke tū tonu;

ka tau iho ēnā mea ki runga ki te mātenga o Hōhepa,

ki te tumuaki hoki ōna i motuhia atu nei i ōna tuākana.

27“Ka haehae a Pineamine ānō he wuruhi,

ka kainga e ia te tūpāpaku i te ata,

ā, i te ahiahi ka tuwhaina e ia ngā taonga parakete.”

28Ko ēnei katoa ngā iwi kotahi tekau mā rua o Īharaira, ko te kōrero hoki tēnei a tō rātou pāpā ki a rātou, ko tāna manaaki i a rātou, i manaakitia rātou e ia, tēnei, tēnei, me tōna manaaki anō.

Te Matenga me te Tanumanga o Hākopa

29Ā, i whakahau ia ki a rātou, i mea ki a rātou, “Ka kohia atu ahau ki tōku iwi. Tanumia ahau ki ōku mātua, ki te ana i te pārae o Eperona Hiti,

30ki te ana i te pārae o Makapera, i te ritenga o Mamere, i te whenua o Kanaana, i hokona, me te pārae anō, e Āperahama i a Eperona Hiti, kia puritia hei tanumanga.

31I tanumia a Āperahama rāua ko Hara, ko tāna wahine, ki reira; i tanumia a Īhaka rāua ko Ripeka, ko tāna wahine, ki reira; i tanumia hoki a Rea e ahau ki reira.

32I hokona te pārae me te ana i reira i ngā tama a Hete.”

33Ā, ka mutu te whakahau a Hākopa ki āna tama, ka pēpeke ake ōna waewae ki roto ki te moenga, ā, ka hemo, ka kohia atu ki tōna iwi.