Ihāia 50 - Maori Bible 2012(MRI2012)

1Ko te kupu tēnei a Ihowā:

“Kei hea ianei te pukapuka whakarere o tō koutou whaea,

i whakarērea ai ia e ahau?

Ko wai rānei te tangata, i ahau āna moni,

i hokona atu ai koutou e ahau ki a ia?

Nanā, he kino nō koutou i hokona atu ai koutou,

nā ā koutou mahi whanokē anō i whakarērea ai tō koutou whaea.

2Nā te aha i tāku haerenga mai i kore ai he tangata?

He aha i tāku karangatanga i kore ai tētahi e oho ake?

Kua mutua koia tōku ringa, tē tau ai te araarai?

Kua kore rānei he kaha mōku hei whakaora?

Nanā, māku, mā tāku kupu riri, ka maroke ai te moana,

ka meinga ai ngā awa hei koraha;

piro ana ō rātou ika i te waikore,

ka mate hoki i te matewai.

3E whakakākahu ana ahau i ngā rangi ki te mangu,

uhia iho te taratara hei hīpoki mō rātou.”

Te Whakamā me te Whakatikatika o te Pononga

4Kua hōmai ki ahau e te Ariki, e Ihowā,

he arero mātau,

kia mōhio ai ahau ki te āta ngārahu atu

i te kōrero ki te tangata e māuiui ana.

E whakaara ana ia i tēnei ata, i tēnei ata,

e whakaara ana i tōku taringa

ki te whakarongo kia pērā me tā te hunga mōhio.

5Kīia oti te whakatuwhera e te Ariki, e Ihowā tōku taringa,

kīhai hoki ahau i tutū,

kīhai i hoki whakamuri.

6Tukua atu ana e ahau tōku tuarā ki ngā kaiwhiu,

ōku pāpāringa ki ngā kaihutihuti;

ko tōku kanohi kīhai i huna

kei whakamā, kei tuwhaina.

7Nō te mea ka āwhinatia mai ahau e te Ariki, e Ihowā;

koia ahau tē whakamā ai;

koia i whakamārōtia ai e ahau tōku kanohi ānō he kiripaka;

e mōhio ana hoki ahau e kore ahau e whakamā;

8e tata ana te kaiwhakatikatika mōku.

Ko wai hei whawhai ki ahau?

Kia tū ngātahi tāua.

Ko wai he hoariri mōku?

Kia tata mai ia ki ahau.

9Nanā, ko te Ariki, ko Ihowā, hei āwhina mōku;

ko wai hei whakahē i ahau?

Nanā, ka tawhitotia katoatia rātou ānō he kākahu,

ka pau rātou i te pūrehurehu.

10Ko wai o koutou e wehi ana i a Ihowā,

e rongo ana ki te reo o tāna pononga;

ko te tangata e haere ana i te pōuri,

kāhore hoki he whakamārama,

kia okioki ia ki te ingoa o Ihowā,

kia taupuhipuhi atu ki tōna Atua.

11Nanā, e koutou katoa e tahu nā i te ahi,

e whītiki nā i a koutou ki ngā rama muramura.

Haere i te mārama o tā koutou ahi,

i ngā rama muramura hoki i whakangihaia nā e koutou!

Tēnei tā tōku ringa mō koutou:

ka takoto iho koutou me te tangi anō.