Hopa 34 - Maori Bible 2012(MRI2012)

Ka Kauwhau a Erihu mō te Tika o te Atua

1I kōrero anō hoki a Erihu, i mea:

2“Whakarongo ki āku kupu, e te hunga whakaaro nui;

kia whai taringa ki ahau, e te hunga mōhio.

3E whakamātau ana hoki te taringa i te kupu,

e pērā ana me tā te māngai ki te reka o te kai.

4Ko tā tātou e whiriwhiri ai mā tātou ko te mea tika;

kia mōhiotia hoki e tātou, e tēnei, e tēnei, ko te aha te mea pai.

5“Kua mea nei hoki a Hopa, ‘He tika tāku,

ā, kua whakapeaua kētia e te Atua te whakawā mōku;

6ahakoa kei ahau te tika ka kīia ahau he tangata teka;

e kore e mahu tōku werohanga, ahakoa kāhore ōku hē.’

7Ko wai te tangata e rite ki a Hopa,

me te mea he wai te tāwai e inumia ana e ia?

8Kua uru nei ki te tira o ngā kaimahi i te hē,

ā, e haere tahi ana me ngā tāngata kikino.

9Kua mea hoki ia, ‘Kāhore he painga ki te tangata

ki te āhuareka atu ia ki te Atua.’

10“Nō reira whakarongo mai ki ahau, e ngā tāngata ngākau mōhio;

e kore rawa te Atua e mahi i te kino;

e kore, rawa hoki te Kaha Rawa e mahi i te hē.

11Ka utua hoki e ia te tangata mō tāna mahi,

ka rite hoki ki tō te tangata ara ngā mea e whakawhiwhia e ia ki a ia.

12Tika rawa, e kore te Atua e kino,

e kore anō hoki te Kaha Rawa e whakaputa kē i te whakawā.

13Nā wai ia i mea hei kaitirotiro mō te whenua?

Nā wai hoki i whakatakoto ngā tikanga mō te ao katoa?

14Ki te anga mai tōna ngākau ki te tangata,

ki te kohia atu e ia ki a ia tōna wairua me tōna manawa;

15ka hemo ngātahi ngā kikokiko katoa,

ā, ka hoki anō te tangata ki te puehu.

16“Nā, ki te mea he ngākau mōhio tōu, whakarongo ki tēnei;

kia whai taringa mai ki te reo o āku kupu.

17E whai kīngitanga rānei tētahi kotahi e kino ana ki te tika?

E whakakino rānei koe ki te tangata tika, kaha hoki?

18E tau ana rānei te mea atu ki te kīngi, ‘He weriweri koe’?

ki ngā rangatira rānei, ‘He kino koutou’?

19Kia iti rawa iho ki a ia e kore nei e whakapai ki te kanohi o ngā rangatira,

e kore nei e hira ake tōna pai ki te hunga whai rawa i ngā rawakore?

Nō te mea he mahi rātou katoa nā ōna ringa.

20Kīhai i aha kua mate rātou;

kua mate i waenganui pō; ka wiri te iwi, ka pahemo atu,

ka riro te hunga nunui, kāhore hoki he ringa.

21“Kei runga hoki i ngā ara o te tangata ōna kanohi,

ā, kitea ana e ia ōna hīkoinga katoa.

22Kāhore he pōuri, kāhore he ātārangi o te mate

e piri ai ngā kaimahi i te kino.

23E kore hoki e nui atu i te tika te mea e whakawahā e ia ki te tangata,

e haere ai ia ki te aroaro o te Atua ki te whakawā.

24Ka wāwāhia e ia ngā tāngata nunui, tē mōhiotia ngā ara,

ā, whakatūria ake ētahi atu i muri i a rātou.

25Nā, e mōhio ana ia ki ā rātou mahi,

ā, hurihia ake rātou e ia i te pō, ā, mongamonga noa rātou.

26He hunga kino rātou, pākia iho e ia i te tirohanga a te tangata;

27mō rātou i tahuri kē i te whai i a ia,

kīhai hoki i whakaaro ki tētahi o ōna ara –

28nā rātou hoki i puta ai te tangi a te rawakore ki a ia,

ā, rongo ana ia ki te tangi a te hunga e tūkinotia ana.

29Ki te meinga e ia kia āta noho, ko wai hei whakararuraru?

Ā, ki te hunā e ia tōna kanohi, ko wai e kite i a ia?

Ahakoa i meatia ki te iwi, ki te tangata rānei, rite tonu.

30Kore ake te whakapono kore e whai kīngitanga,

kore ake te iwi e māhangatia.

31“Kua mea atu rānei ki te Atua,

‘Kua pēhia ahau e te whiu;

e kore ahau e mahi i te hē ā muri nei?

32Ko te mea kīhai i kitea e ahau māu e whakaatu mai ki ahau;

ki te mea i mahi ahau i te hē, ka mutu tāku.’

33Kia rite rānei tāna utu ki tāu e mea ai,

i whakakāhoretia ai e koe?

Māu te whiriwhiri, kāhore māku;

nā, māu e kōrero mai tāu i mōhio ai.

34“Ka kōrero mai ngā tāngata ngākau mahara ki ahau,

āe rā, ngā tāngata whakaaro nui e whakarongo ana ki ahau,

35‘Kāhore he mātauranga o Hopa i a ia i kōrero rā,

kāhore hoki he mahara i roto i āna kupu.’

36He pai me i whakamātauria a Hopa ā te mutunga rā anō,

mō āna kupu i whakahokia mai nei e ia,

he mea i rite ki ā ngā tāngata kikino.

37E tāpiritia ana hoki e ia te tutū ki runga ki tōna hara,

kei te pakipaki ia i ōna ringa i waenganui i a tātou,

ā, whakanuia ana e ia āna kupu ki te Atua.”