Hopa 36 - Maori Bible 2012(MRI2012)

Ka Whakanuia e Erihu te Painga o te Atua

1I kōrero anō a Erihu, i mea:

2“Tukua ahau, kia iti nei, ā, ka whakaatu ahau ki a koe;

he kupu anō hoki āku mō tā te Atua.

3Ka tīkina atu e ahau tōku mōhio i tawhiti,

ka whakatikaia e ahau tā tōku Kaihanga.

4E kore rawa hoki; āku kupu e teka;

tēnei kei a koe te tangata kua tino nui tōna mātauranga.

5“Nanā, he pakari te Atua, e kore anō ia e whakahāwea;

pakari tonu te kaha o tōna mātauranga.

6E kore te tangata kino e whakaorangia e ia;

māna te hunga mate e whiwhi ai ki ngā mea e tika ana mā rātou.

7E kore e mutu tāna titiro ki te tangata tika;

engari ka whakanohoia ngātahitia rātou e ia

me ngā kīngi ki runga ki te torōna ake ake,

ā, ka whakanekehia ake hoki rātou.

8Ki te mea kua herea rātou ki te mekameka,

mau pū i te rāhiri, arā i ngā mate,

9ā, ka whakakitea e ia ki a rātou tā rātou mahi,

me ō rātou hē, i mea ai rātou i ngā mea whakapehapeha.

10Ka whakapuaretia anō e ia ō rātou taringa ki te ako,

ā, ka kī kia hoki i te kino.

11Ki te rongo rātou, ā, ka mahi ki a ia,

ka pau ō rātou rā i runga i te pai,

ō rātou tau i runga i ngā āhuareka.

12Otirā, ki te kore rātou e rongo, ka ngaro rātou i te hoari,

hemo iho rātou, kāhore hoki he mātauranga.

13“Ko te hunga whakapono kore ō rātou ngākau,

pūranga rawa i a rātou te riri;

kāhore ā rātou karanga āwhina ina herea rātou e ia.

14Ka mate rātou i te taitamarikitanga,

ā, ka ngaro tō rātou ora i roto i te hunga poke.

15Ko tāna he whakaora i te rawakore ina mate,

e whakapuaretia ana e ia ō rātou taringa ina tūkinotia.

16Āe rā, me koe anō, tērā koe e riro i a ia

i roto i te kūititanga ki te wāhi whānui;

ā, kī tonu i te ngako te mea e whakatakotoria ki runga ki tāu tēpu.

17“Otiia kī tonu koe i te tikanga a te tangata kino;

ā, mau pū koe i ngā tikanga, i te whakarite whakawā.

18Nā, i te mea he riri tēnei, kia tūpato kei riro koe i te nui o āu rawa;

aua hoki koe e whakapeautia e te nui o te utu.

19E ranea rānei ōu rawa, e kore ai koe e taka hē?

Ngā uaua katoa rānei o tōu kaha?

20Kaua e hiahiatia te pō,

te wā e riro ai ngā tāngata i runga i tō rātou wāhi.

21Kia tūpato, kaua e tahuri ki te kino;

ki tāu hoki he pai ake tēnei i ngā mate.

22Nanā, ko te Atua, ko tōna kaha hei whakanui,

ko wai te kaiwhakaako hei rite mōna?

23Ko wai te kaitohutohu i te ara mōna?

Ko wai hei mea, ‘Kua hē tāu mahi’?”

Ka Kauwhau a Erihu i te Rangatiratanga o te Atua

24“Kia mahara kia whakanuia e koe tāna mahi,

e waiatatia nei e te tangata.

25Kua tirohia nei e ngā tāngata katoa

e mātakitakina mai nei e te tangata i tawhiti.

26Nanā, he nui te Atua, e kore anō e mōhiotia e tātou;

e kore anō hoki te maha o ōna tau e taea te rapu atu.

27“Ko ia nei hei ngongo ake i ngā pata wai,

ka tauia i tōna kohu hei āwhā;

28ka ringihia iho nei e ngā kapua,

ā, ka māturuturu nui ki runga ki te tangata.

29Āe rā, e mōhiotia ana rānei e tētahi ngā horahanga o ngā kapua,

te ngangau o tōna tapenākara?

30Nanā, e horahia ana e ia tōna mārama ā tawhio noa i a ia;

e hīpokina ana hoki e ia te takere o te moana.

31Ko āna mea hoki ēnā hei whakawā mō ngā iwi,

nui tonu te kai e hōmai ana e ia.

32E hīpokina ana e ia ōna ringa ki te uira,

ā, whakahaua iho e ia te wāhi e pā atu ai.

33Hei kaiwhakaatu i a ia tōna haruru,

e waitohu ana hoki ki ngā kararehe i te tūpuhi meāke puta mai.