Ihāia 15 - Maori Bible 2012(MRI2012)

He Poropititanga mō Moapa

1Ko te poropititanga mō Moapa:

He pō kotahi ka ngaro a Ara o Moapa,

ā, kore iho!

He pō anō hoki, ka ngaro a Kiri o Moapa,

ā, kore iho!

2Kua riro ia ki runga ki Paiti, ki Ripono,

ki ngā wāhi tiketike tangi ai;

ka auētia e Moapa a Nepo rāua ko Merepa.

He mea moremore katoa ō rātou māhunga,

tapahi rawa ngā kumikumi katoa.

3Ko ō rātou whītiki i ō rātou ara he kākahu taratara;

ka auē rātou katoa i runga i ō rātou whare,

i ō rātou waharoa,

nui atu te tangi.

4Ka hāmama hoki a Hehepona rāua ko Ereare;

ka rangona tō rātou reo i Iahata rawa.

Nō reira hāmama ana ngā mau patu o Moapa;

ka wiri tōna wairua i roto i a ia.

5E tangi ana tōku ngākau ki a Moapa;

rere ana ōna rangatira ki Toara,

ki Ekarata Herihia.

He tangi nei hoki tā rātou i te pikitanga ki Rūhiti,

i te mea e piki ana i reira;

i te ara hoki ki Horonaimi

ka pā tā rātou karanga o te ngaromanga.

6Ka takoto kau noa ngā wai o Nimirimi;

kua maroke hoki te tarutaru,

kua mate te otaota,

kāhore he mea e tupu ana.

7Nā, ko ā rātou mea maha,

me ā rātou mea i te rongoā,

ka kawea e rātou ki te awa i ngā wirou.

8Kua taiāwhiotia hoki

ngā rohe o Moapa e te karanga;

kua tae tōna auē ki Ekeraima,

tōna auē ki Peererimi.

9Kei te kī hoki ngā wai o Rimono i te toto;

tērā atu tāku e whakapā ai ki Rimono –

he raiona ki ngā oranga o Moapa,

ki ngā mōrehu anō o te whenua.