1Nā, ka whakahau a Mohi rātou ko ngā kaumātua o Īharaira i te iwi, ka mea: “Puritia ngā whakahau katoa e whakahau nei ahau ki a koutou i tēnei rā.
2Ā tēnei ake, ā te rā e whiti atu ai koutou i Horano ki te whenua e hōmai ana e Ihowā, e tōu Atua, ki a koe, nā, ka whakaara ake koe i ētahi kōhatu nunui māu, ka pani hoki ki te raima.
3Ka tuhituhi hoki i ngā kupu katoa o tēnei ture ki reira, ua whiti atu koe; kia haere atu koe ki te whenua e hōmai ana e Ihowā, e tōu Atua, ki a koe, ki te whenua e rerengia ana e te waiū, e te honi, kia pērā me tā Ihowā, me tā te Atua o ōu mātua, i kōrero ai ki a koe.
4Mō reira, e whiti koutou i Horano, me whakaara ēnei kōhatu e whakahaua nei e ahau i tēnei rā ki a koutou, ki runga ki Maunga Ēpara ka pani hoki ki te raima.
5Ā, me hanga e koe ki reira tētahi āta mā Ihowā, mā tōu Atua, hei te āta kōhatu; kaua e ākina iho e koe ki te rino.
6Me hanga e koe te āta mā Ihowā, mā tōu Atua, ki ngā kōhatu toitū; ka whakaeke ai i ngā tahunga tinana mā Ihowā, mā tōu Atua, ki runga;
7patua hoki ngā whakahere mō te pai, ā, kainga ki reira; me te koa anō ki te aroaro o Ihowā, o tōu Atua.
8Ka tuhituhi hoki i ngā kupu o tēnei ture ki ngā kōhatu, kia mārama tonu.”
9I kōrero anō a Mohi rātou ko ngā tohunga, ko ngā Rīwaiti, ki a Īharaira, i mea, “Noho puku mai, ā, whakarongo, e Īharaira; nō tēnei rā i meinga ai koe hei iwi mō Ihowā, mō tōu Atua.
10Nā, me whakarongo koe ki te reo o Ihowā, o tōu Atua, me mahi hoki i āna whakahau, me āna tikanga e whakahaua atu nei e ahau ki a koe i tēnei rā.”
He Kanga ki te Mahi Tutū11I whakahau hoki a Mohi i te iwi i taua rangi anō, i mea:
12Ko ēnei e tū ki runga ki Maunga Keritimi hei manaaki i te iwi, ua whiti atu koutou i Horano; ko Himiona, ko Rīwai, ko Hūrā, ko Ihākara, rātou ko Hōhepa, ko Pineamine.
13Ko ēnei e tū ki runga ki Maunga Ēpara hei kanga; ko Reupena, ko Kara, ko Āhera, ko Hepurona, ko Rāna, ko Napatari.
14Nā, ka kōrero ngā Rīwaiti, ka mea, kia nui hoki te reo, ki ngā tāngata katoa o Īharaira:
15“Kia kangā te tangata e hanga ana i te whakapakoko, i te mea whakairo, whakarewa rānei, e whakariharihangia nei e Ihowā, he mea mahi nā te ringa o te kaimahi, e whakanoho ana hoki i taua mea ki te wāhi ngaro.”
Mā te iwi katoa e whakahoki, e mea, “Āmine.”
16“Kia kangā te tangata e whakahāwea ana ki tōna pāpā, ki tōna whaea rānei.”
Mā te iwi katoa e whakahoki, e mea, “Āmine.”
17“Kia kangā te tangata e neke atu ana i te rohe o tōna hoa.”
Mā te iwi katoa e mea, “Āmine.”
18“Kia kangā te tangata e whakapōhēhē ana i te matapō ki te huarahi.”
Mā te iwi katoa e mea, “Āmine.”
19“Kia kangā te tangata e whakaputa kē ana i te whakawā mō te manene, mō te pani, mō te pouaru.”
Mā te iwi katoa e mea, “Āmine.”
20“Kia kangā te tangata e moe ana ki te wahine a tōna pāpā; mōna i hura i te remu o tōna pāpā.”
Mā te iwi katoa e mea, “Āmine.”
21“Kia kangā te tangata e moe ana ki tētahi kararehe.”
Mā te iwi katoa e mea, “Āmine.”
22“Kia kangā te tangata e moe ana ki tōna tuahine, ki te tamāhine a tōna pāpā, ki te tamāhine rānei a tōna whaea.”
Mā te iwi katoa e mea, “Āmine.”
23“Kia kangā te tangata e moe ana ki tōna hungawai wahine.”
Mā te iwi katoa e mea, “Āmine.”
24“Kia kangā te tangata e patu puku ana i tōna hoa.”
Mā te iwi katoa e mea, “Āmine.”
25“Kia kangā te tangata e tango ana i te utu mō te patunga o te tangata harakore.”
Mā te iwi katoa e mea, “Āmine.”
26“Kia kangā te tangata e kore e mau i a ia ngā kupu o tēnei ture, hei mahi māna.”
Mā te iwi katoa e mea, “Āmine.”
Who We AreWhat We EelieveWhat We Do
2025 by iamachristian.org,Inc All rights reserved.
