Nahumu 3 - Maori Bible 2012(MRI2012)

Ka Tata te Turaki

1Auē te mate mō te pā toto!

Kua kī katoa i te teka, i te pāhua –

kāhore e mutu te muru taonga!

2Ko te haruru o te whiu,

ko te ngaehe o ngā wīra e kekē ana;

ko ngā hōiho e takatakahi ana,

ko ngā hāriata e tarapekepeke ana.

3Ko ngā kaieke hōiho e ekeeke ana,

ko te wheriko o te hoari,

ko te kanapa o te tao;

ko te tini o te tūpāpaku,

me te pūranga nui o ngā tinana mate –

ā, kāhore he mutunga o ngā tinana;

tūtuki ana te waewae ki ō rātou tinana.

4He maha hoki nō ngā kairautanga o te wahine ātaahua i kairau nei;

ko te rangatira nei ia o ngā mākutu,

e hoko nei i ngā iwi ki āna kairautanga,

i ngā hapū anō ki āna mahi mākutu.

5“Nanā, hei hoariri tēnei ahau mōu,”

e ai tā Ihowā o ngā mano,

“ka hurahia anō e ahau ngā remu o tōu ki tōu aroaro;

ka whakakite anō ahau i a koe e noho tahanga ana ki ngā iwi,

me tōu whakamā ki ngā kīngitanga.

6Ā, ka makā e ahau he mea whakarihariha ki runga ki a koe,

ka whakaititia koe e ahau,

ka meinga hei tirohanga atu.

7Nā, ko te hunga katoa e kite ana i a koe

ka rere atu i a koe, ā, ka mea,

‘Kua ururuatia a Ninewe; ko wai hei tangi ki a ia?’

Me rapu e ahau ki hea he kaiwhakamārie mōu?”

8He pai ake rānei koe i Noamono,

i tū nei i roto i ngā awa,

he mea karapoti e ngā wai,

ko tōna pekerangi ko te moana,

nō te moana anō tōna taiepa?

9Ko tōna kaha ko Etiopia,

ko Īhipa, kāhore hoki he mutunga;

he āwhina nōu a Putu, a Rūpimi.

10Heoi, kua whakaraua atu ia,

kua riro hei pārau.

Ko āna kōhungahunga tāia iho

i te ahunga mai o ngā ara katoa,

mongamonga noa,

i maka rota rātou mō ōna tāngata nunui,

ko ōna tāngata rarahi katoa

here rawa ki te mekameka.

11Tērā anō koe ka haurangi,

ka huna koe;

ā, ka rapu koe

he wāhi kaha i te wehi o te hoariri.

12Ko ōu pā taiepa katoa ka rite ki te piki

he hua mātāmua nei ōna –

ki te rurerurea, ka taka

ki roto ki te māngai o te tangata e kai ana.

13Nanā, he wāhine ōu tāngata

i waenganui i a koe.

Ko ngā kūwaha o tōu whenua

tuwhera pū ki ōu hoariri;

ka pau ōu tūtaki i te ahi.

14Utuhia he wai mōu mō te whakapaenga,

whakakahangia ōu pā taiepa;

haere ki te mahi paru,

takatakahia te mea pokepoke,

kia ū te tahunga pereki.

15Ka pau koe i te ahi i reira,

ka hātepea atu koe e te hoari,

ko tāna kai i a koe ka rite ki tā te tātarakihi.

Whakaraneatia koe, kia rite ki te tātarakihi,

whakaraneatia koe, kia rite ki te māwhitiwhiti.

16Ko āu kaihokohoko

whakatokomahatia ake e koe i ngā whetū o te rangi.

Ko tā te tātarakihi he pāhua, ā, rere ana.

17Ko ōu tāngata i te pōtae kīngi,

ko tō rātou rite kei te māwhitiwhiti,

ko ōu rangatira rite tonu ki ngā pōkai māwhitiwhiti

e noho nei i ngā taiepa

i te rā māeke i te whitinga o te rā ka rere rātou,

kāhore hoki e mōhiotia tō rātou wāhi, kei hea rā?

18Kei te moe āu hēpara,

e te kīngi o Ahiria;

ko āu metararahi kei te takoto.

Kua marara atu tōu iwi ki runga ki ngā maunga,

kāhore hoki he kaihuihui.

19Kāhore he whakamāhunga i tōu pakaru;

he mamae rawa tōu marūtanga.

Ko te hunga katoa e rongo ana i te rongo ki a koe,

ka papaki ō rātou ringa ki a koe.

I kore hoki ki a wai

te pānga tonutanga o tōu kino.