Ihāia 5 - Maori Bible 2012(MRI2012)

Te Waiata mō te Māra Wāina Huakore

1Nā, me waiata e ahau he waiata

nā tāku i aroha nei mō tāku i kaingākau ai,

he mea mō tāna māra wāina:

He māra wāina tā tāku kaingākau

i tētahi pukepuke mōmona.

2Nā, taiepatia ana e ia, kohikohia ana e ia ngā kōhatu o reira,

whakatōkia ana e ia ki te wāina pai rawa;

hangā ana e ia he pourewa ki waenganui,

keria ana anō e ia he poka wāina ki reira;

ā, ka tatari ia kia whai karepe,

nā, ka hua mai he karepe māori.

3Nā, e te hunga e noho nei i Hiruhārama,

me ngā tāngata o Hūrā,

whakaritea tā māua whakawā

ko tāku māra wāina.

4Ko te aha ake anō rā i āhei kia mahia ki tāku māra,

kīhai i mahia e ahau ki reira?

He aha rā, i ahau i tatari ai kia hua mai he karepe,

i puta kē mai ai he karepe māori?

5Nā ināianei, māku e whakaatu ki a koutou

tāku e mea ai ki tāku māra wāina.

Ka tangohia atu e ahau tōna pā whakaruru hau,

ā, ka pau ia te kai;

ka tukitukia hoki e ahau tōna taiepa,

ā, ka takatakahia.

6Ā, ka meinga e ahau kia ururua;

e kore e tapatapahia, e kore e ngakia,

engari, ka huaranga ake te tātarāmoa me te tūmatakuru;

ka ako atu hoki ahau ki ngā kapua

kia kaua te ua e uaina ki reira.

7Ko te māra wāina hoki a Ihowā o ngā mano,

ko te whare o Īharaira,

ā, ko ngā tāngata o Hūrā

tāna mea āhuareka i whakatō ai;

ka tatari ia ki te whakawā, nā, ko te tūkino;

ki te tika, nā, he auē.

Ka Whakahorihoria te Tūkino Pāpori

8Auē te mate mō te hunga e hono ana i te whare ki te whare,

e whakapiri nei i te māra ki te māra,

ā, kore noa iho he wāhi,

ā, ka meinga koutou kia noho, ko koutou anake,

i waenganui i te whenua!

9Ko tā Ihowā o ngā mano tēnei i hamumu ai ki ōku taringa:

“He pono, he tini ngā whare ka mokemoke,

tōna nunui, tōna ātaahua, ka noho tahanga kau.

10Nō te mea kotahi tekau ngā eka o te māra wāina,

ka maea ake kotahi tonu te pāti;

i kī te homa i te purapura, ka maea ake kotahi te epa.”

11Auē te mate mō te hunga e maranga wawe ana i te ata

ki te whai i te wai kaha;

e kawe ana i te roa o te pō,

nāwai ā, ka tahuna e te wāina,

12ko te hāpa me te hātere,

ko te timipera me te pūtōrino, ko te wāina,

kei ā rātou hākari ēnā, heoi, kāhore ā rātou mahara ki te mahi a Ihowā,

kāhore hoki he whakaaro ki te mahi a ōna ringa!

13Koia i riro ai tōku iwi i te pārau, he kore mātauranga;

ko ō rātou tāngata ingoa nui hoki kua hemo i te kai,

ā, ko tō rātou mano tini kua pakapaka rawa i te matewai.

14Nā reira te rēinga i whakanui ai i tōna hiahia,

i whewhera noa atu ai i tōna māngai;

ā, heke atu ana ki reira tō rātou korōria,

ō rātou mano tini, tō rātou whakahī,

me te tangata e whakamanamana ana i roto i a rātou.

15Ka whakapikoa anō hoki te tangata ware,

ā, ka whakaititia te tangata nui,

ka whakahokia iho hoki ngā kanohi o te hunga whakakake.

16Otiia ka whakanekehia ake a Ihowā o ngā mano i runga i te whakawā,

ka whakatapua anō te Atua, te Mea Tapu, i runga i te tika.

17Ko reira ngā reme kai ai, ānō kei tō rātou wāhi,

ā, ka kainga e ngā mea haere noa ngā wāhi kua ururuatia o te hunga tetere.

18Auē te mate mō te hunga e kūmea ana e rātou te hē ki ngā aho o te horihori,

te hara hoki me te mea ki te taura o te kāta;

19e mea nei, “Kia hihiko ia,

kia hohoro tāna mahi,

kia kite ai mātou;

kia whakatata mai hoki,

kia tae mai te whakaaro o te Mea Tapu o Īharaira,

kia mōhio ai mātou!”

20Auē te mate mō te hunga e mea nei ki te kino, he pai,

ki te pai hoki, he kino;

e mea nei i te pōuri hei mārama,

i te mārama hoki hei pōuri;

e mea nei i te kawa hei reka,

i te reka hei kawa!

21Auē te mate mō te hunga he nui nei ō rātou whakaaro ki tā rātou titiro,

e mahara ana hoki he hunga mōhio rātou!

22Auē te mate mō te hunga kaha ki te inu wāina,

he hunga uaua anō ki te whakaranu i te wai kaha;

23e whakatika nei i tā te tangata hē, he whakaaro ki te utu;

e tango atu nei i te tika o te tangata tika.

Ka Poropititia te Whakaekenga a ngā Iwi Kē

24Mō reira ka rite ki te kainga a te arero o te ahi i te kakau wīti,

ki te hinganga o te otaota maroke ki roto ki te mura;

ka pērā tō rātou pakiaka te pirau,

ka rere tō rātou puāwai ki runga, ānō he puehu;

mō rātou i whakakāhore ki te Ture a Ihowā o ngā mano,

i whakahāwea anō hoki ki te kupu a te Mea Tapu o Īharaira.

25Nā reira te riri o Ihowā i mura ai ki tāna iwi,

ā, kua torona e ia tōna ringa ki te whawhai ki a rātou, ā, patua iho rātou e ia;

i ngāueue ngā maunga,

ā, ko ō rātou tinana mate me te mea he paru

i waenganui o ngā huarahi.

Nā, ahakoa tēnei katoa, kāhore tōna riri i te tahuri atu,

mārō tonu tōna ringa.

26Ka whakaarahia anō hoki e ia he kara ki ngā iwi i tawhiti;

ka whiowhio anō ki a rātou ki te pito o te whenua.

Nanā, ka hohoro, ka tere tonu tā rātou haere mai!

27E kore tētahi o rātou e ngenge, e kore e tapepa te waewae;

e kore tētahi e parangia, e kore e moe;

e kore te whītiki o ō rātou hope e mawheto,

e kore anō te here o ō rātou hū e motu;

28ko ā rātou pere, koi tonu,

he piko katoa ā rātou kōpere;

ko ngā pāua o ō rātou hōiho ka kīia he matā,

ā, ko ō rātou wīra he āwhiowhio.

29Ko tā rātou hāmama, koia anō kei tā te raiona,

ka hāmama rātou ānō he kūao raiona;

āe rā, ka ngengere rātou, ka hopukina tā rātou tūpāpaku,

kāwhakina tonutia atu, kāhore hoki he tangata hei whakaora.

30Nā, ka hāmama rātou ki a rātou i taua rā,

me te mea ko te moana e haruru ana;

ā, ki te titiro tētahi ki te whenua –

nanā, he pōuri me te tuatea,

ā, kua pōuri te mārama i ōna kapua.