Waiata a Horomona 2 - Maori Bible 2012(MRI2012)

Te Wahine

1He puāwai ahau nō Harono,

he rengarenga nō ngā awaawa.

Te Tāne

2He rengarenga i roto i ngā tātarāmoa,

ko tāku e aroha nei i waenga i ngā tamāhine.

Te Wahine

3Kei te āporo i roto i ngā rākau o te ngahere

te rite o tāku kaingākau i roto i ngā taitamariki.

Āhuareka ana tāku noho iho i raro i tōna taumarumarutanga,

ā, he reka āna hua ki tōku ngao.

4I kawea ahau e ia ki te whare hākari,

ā, ko tōna kara i runga i ahau he aroha.

5Whakakahangia ake ahau ki te karepe whakamaroke,

whakahauorangia ahau ki te āporo;

e mate ana hoki ahau i te aroha.

6Kei raro i tōku māhunga tōna mauī,

e awhi ana tōna matau i ahau.

7He kī tēnei nāku ki a koutou, e ngā tamāhine o Hiruhārama,

i te aroaro anō o ngā anaterope, o ngā hāta o te pārae:

kaua e whakaohokia, kaua e whakaarahia tāku e aroha nei,

ā kia pai rā anō ia.

Kua Pahemo te HōtokeTe Wahine

8Ko te reo rā o tāku e aroha nei!

Nanā, te haere mai nei ia,

e tūpekepeke ana i runga i ngā maunga,

e mokowhiti ana i runga i ngā pukepuke.

9Rite tonu tāku e aroha nei ki te anaterope,

ki te kūao hāta rānei.

Tēnei ia te tū mai nei

i muri o tō mātou taiepa,

e mātakitaki mai ana i ngā matapihi,

e whakaata mai ana rā roto i te mea rīpekapeka.

10I kōrero mai tāku e aroha nei, i mea mai ki ahau:

“E ara, e tāku ipo, e tāku mea ātaahua,

ka haere mai.

11Nanā, kua pahemo te hōtoke,

kua mutu te ua, kua kore.

12Kua puta ngā puāwai ki te whenua;

kua tata te wā e korihi ai ngā manu,

ā, e rangona ana te reo o te kūkupa

ki tō tātou whenua.

13Kua kōpuku ngā hua hou o te piki,

kua puaka ngā wāina, e kakara mai nei.

Maranga, e tōku hoa, e tāku mea ātaahua,

haere mai hoki.”

Te Tāne

14E tāku kūkupa i roto i ngā kapiti o te kāmaka,

i te wāhi ngaro o te pikitanga,

kia kite ahau i tōu āhua, kia rongo ahau i tōu reo;

he reka hoki tōu reo, he ātaahua tōu mata.

15Hopukia mai mā tāua ngā pokiha,

ngā pokiha ririki

e takakino nei i ā tāua māra wāina;

kua puāwai hoki ā tāua wāina.

Te Wahine

16Nāku tāku kaingākau, nāna hoki ahau;

kei waenga ia i ngā rengarenga e whāngai ana i tāna kāhui.

17I te mea kīanō i mātao te rā,

ā, kīanō i rere noa ngā ātārangi,

tahuri mai, e tāku e aroha nei,

kia rite koe ki te anaterope,

ki te kūao hāta,

i ngā maunga o Pētere.