Waiata 102 - Maori Bible 2012(MRI2012)

He Īnoi o tētahi Taitama ĀwangawangaHe īnoi nā te ngākau mamae, i a ia e pēhia ana, ā, maringi a wai ana tāna tangi ki te aroaro o Ihowā.

1Whakarongo ki tāku īnoi, e Ihowā,

kia puta atu tāku tangi ki a koe.

2Kaua e hunā tōu mata ki ahau

i te rā e pōuri ai ahau.

Whakatītahatia mai tōu taringa ki ahau;

hohoro te whakahoki kupu mai ki ahau i te rā e karanga ai ahau.

3Ka memeha hoki ōku rā ānō he paoa;

ka kāia ōku wheua ānō he motumotu.

4Kua pākia tōku ngākau, kua memenge, ānō he tarutaru;

i wareware ai ahau ki te kai i tāku taro.

5Piri tonu ōku iwi ki tōku kiri

i tōku reo auē.

6He rite ahau ki te matuku i te koraha,

ki te koukou i te wāhi mokemoke.

7Mataara tonu ahau;

tōku rite kei te pīhoihoi mokemoke i runga i te tuanui.

8E tāwai ana ōku hoariri ki ahau i te rā roa;

ko te hunga e pōrangirangi ana mai ki ahau, ko ahau tā rātou oati.

9Kainga ana e ahau te pungarehu ānō he taro;

whakananua iho tōku wai inu ki te roimata.

10I tōu riri hoki, i tōu weriweri;

nāu hoki ahau i hāpai ake, ā, tāia atu anō ahau e koe.

11He rite ōku rā ki te ātārangi e whakawairua kau ana;

ā, kua memenge ahau ānō he tarutaru.

12Ko koe ia, e Ihowā, ka mau tonu ake ake,

ka maharatia anō koe e ngā whakatupuranga katoa.

13Tērā koe e whakatika, e aroha ki a Hiona;

kua taka mai hoki te wā,

āe rā, te tino wā, hei atawhainga i a ia.

14E manakohia ana hoki e āu pononga ōna kōhatu,

e āwangawanga ana ki tōna puehu.

15Pēnei ka wehingia te ingoa o Ihowā e ngā tauiwi,

tōu korōria hoki e ngā kīngi katoa o te whenua.

16Nā Ihowā hoki i hanga a Hiona,

kua kitea ia i tōna korōria.

17Kua tahuri ia ki te īnoi a te rawakore;

kīhai i whakahāwea ki tā rātou īnoi.

18Ka tuhituhia tēnei mō tō muri whakatupuranga;

ā, ka whakamoemiti ki a Ihowā te iwi meāke hangā:

19mōna i titiro iho i te tiketike o tōna wāhi tapu;

i titiro iho a Ihowā i te rangi ki te whenua;

20ki te whakarongo ki te auē a te herehere,

ki te wewete i te hunga kua motuhia mō te mate;

21kia whakapuakina ai te ingoa o Ihowā i Hiona,

me te whakamoemiti ki a ia i Hiruhārama;

22i te huihuinga o ngā iwi,

o ngā kīngitanga, ki te mahi ki a Ihowā.

23Whakangoikoretia iho e ia tōku kaha i te ara;

kua torutoru i a ia ōku rā.

24I mea ahau,

“E tōku Atua, kaua ahau e tangohia i waenganui o ōku rā;

kei ngā whakatupuranga katoa ōu tau.”

25Nōnamata te whenua i whakatūria ai e koe,

ā, he mahi ngā rangi nā ōu ringa.

26Ko ērā e hemo atu, ko koe ia e mau tonu;

āe rā, ka tawhitotia katoatia me he weweru.

Ka whakaputaia kētia rātou e koe ānō he kākahu,

ā, ka whakaputaia kētia.

27Ko koe ia, ko koe tonu,

kāhore hoki he mutunga o ōu tau.

28Ka whai nohoanga ngā tama a āu pononga,

ka pūmau ō rātou uri ki tōu aroaro.