Ihāia 48 - Maori Bible 2012(MRI2012)

Ko Ihowā te Kaihanga, te Kaiwhakaora hoki

1“Whakarongo ki tēnei, e te whare o Hākopa,

e te hunga kua huaina nei ko Īharaira hei ingoa mō koutou,

kua puta ake nei i roto i ngā wai o Hūrā;

e whakaoati ana i te ingoa o Ihowā,

e whakahua ana i te Atua o Īharaira,

ehara ia i te mea i runga i te pono, i te tika.

2Ki tā rātou karanga hoki, nō te pā tapu rātou,

e okioki ana hoki ki te Atua o Īharaira;

ko Ihowā o ngā mano tōna ingoa.

3“He mea whakaatu nāku nōnamata ngā mea ō mua;

āe rā, i puta anō hoki aua mea i tōku māngai, he mea kōrero nāku;

kitea rawatia ake kua mahia e ahau, kua puta.

4I mōhio hoki ahau he pakeke koe,

he uaua rino hoki tōu kakī,

he parāhi tōu rae.

5Nā reira nāku i whakaatu ki a koe inamata;

kīanō i puta kua kōrerotia e ahau ki a koe;

kei kī koe, ‘Nā tāku whakapakoko ēnā mahi,

he mea whakahau ēnei nā te mea i whaowhaoa e ahau,

nā te mea i whakarewaina e ahau.’

6“Kua rongo koe; tirohia tēnei katoa;

ā, e kore ianei e whakaaturia e koutou?

Kua kōrerotia nei e ahau ki a koe he mea hou,

he mea i muri i tēnei wā, he mea huna, kīhai i mōhiotia e koe.

7He mea hanga nōnāianei, kāhore hoki inamata;

i mua i tēnei rā kīhai i rangona e koutou;

kei kī koe, ‘Nanā, i mōhiotia e ahau.’

8Āe rā, kīhai koe i rongo, kīhai i mōhio;

āe rā, mai ō mua kīhai tōu taringa i whakapuaretia.

I mōhio hoki ahau i mahi tinihanga koe,

ā, nō te kōpū anō koe i huaina ai he poka kē.

9“Ka whakaaro ahau ki tōku ingoa, ā, ka pūhoi tōku riri;

ka whakaaro ki te whakamoemiti ki ahau,

ā, ka pēhi i tāku ki a koe, kei hātepea atu koe.

10Kua oti ōu para te tahi e ahau, ehara ia i te mea hei hiriwa;

he mea whiriwhiri koe nāku i roto i te oumu, i te tangi.

11He whakaaro ki ahau, he whakaaro ki ahau, i meatia ai tēnei e ahau.

Kia whakapokea koia tōku ingoa?

E kore anō tōku korōria e hoatu e ahau ki tētahi atu.

12“Whakarongo ki ahau, e Hākopa,

e Īharaira, e tāku i karanga ai:

Ko ahau ia, ko ahau te tuatahi,

ko ahau anō te mutunga.

13Āe rā, nā tōku ringa i whakatakoto ngā tūranga o te whenua,

nā tōku matau i hora ngā rangi;

ki te karangatia rātou e ahau,

ka tū ngātahi rātou.

14“Huihui mai, e koutou katoa, whakarongo hoki!

Nā wai o rātou ēnei mea i whakaatu?

He mea aroha ia nā Ihowā;

ka oti i a ia tāna i pai ai ki Papurōna,

ka pā anō tōna ringa ki ngā Karari.

15Nāku, nāku te kupu, āe rā, he mea karanga ia nāku,

nāku ia i kawe mai, ka tika anō i a ia tōna ara.

16“Whakatata mai ki ahau, whakarongo ki tēnei!

“Ko tāku, nō te tīmatanga rā anō ehara i te kōrero puku;

i ngā wā o aua mea, i reira ahau.”

Nā ināianei, nā te Ariki, nā Ihowā ahau i unga mai,

nā tōna wairua anō.

17Ko te kupu tēnei a Ihowā,

a tōu kaihoko, a te Mea Tapu o Īharaira:

“Ko Ihowā ahau, ko tōu Atua

e whakaako nei i a koe ki te pai mōu,

e ārahi nei i a koe i te ara e haere ai koe.

18Auē, me i rongo koe ki āku whakahau,

inā, kua rite ki te awa te mau o te rongo ki a koe;

ko tōu tika, koia anō kei ngā ngaru o te moana.

19Kua rite anō ōu uri ki te onepū,

ngā whānau o ōu whēkau ki te kirikiri o reira;

ko tōna ingoa kīhai i hātepea atu,

kīhai i whakangaromia i tōku aroaro.”

20Haere atu i Papurōna,

e rere i roto i ngā Karari;

kia waiata te reo i a koutou e whakaatu ana;

kōrerotia tēnei,

whakapuakina ki te pito o te whenua;

kī atu, “Kua oti i a Ihowā tāna pononga, a Hākopa te hoko.”

21Kīhai anō rātou i matewai i a ia e ārahi ana i a rātou i ngā koraha;

i meinga e ia te wai mō rātou kia rere i roto i te kāmaka;

i wāhia e ia te kāmaka,

ā, pupū mai ana te wai.

22“Kāhore he maunga rongo ki te hunga kino,” e ai tā Ihowā.