Ihāia 21 - Maori Bible 2012(MRI2012)

He Poropititanga mō Papurōna, Ēroma, Arāpia hoki

1Ko te poropititanga mō te koraha o te moana:

Ka rite ki ngā āwhiowhio i te tonga e pupuhi ana,

tōna haerenga mai i te koraha

i te whenua e wehingia ana.

2He kino rawa te kitenga kua whakaaturia nei ki ahau;

kei te tinihanga te tangata tinihanga,

kei te pāhua te kaipāhua.

Whakaekea, e Erama whakapaea, e Meria mutu pū i ahau

ngā auētanga katoa o reira.

3Nā reira kī tonu tōku hope i te mamae,

whakawiri rawa ngā mea e ngau nei i ahau,

ānō ko te whakawiringa o te wahine e whakawhānau ana;

mamae ana ahau, kore ake e rongo;

ohorere ana, kore ake e kite.

4Kahekahe ana tōku manawa,

wehi ana i te whakamataku;

ko te ahiahi pō i hiahiatia e ahau,

puta ake ana hei mea e tūiri ai ahau.

5Kei te whakapai rātou i te tēpu,

kua whakaritea he kaitūtei;

kei te kai rātou, kei te inu.

Whakatika, e ngā rangatira,

pania te whakangungu rākau.

6Ko tā te Ariki kupu hoki tēnei ki ahau:

“Tīkina, whakatūria he kaitūtei,

māna e whakaatu tāna e kite ai.

7Nā, ka kitea e ia te ope,

ngā kaieke hōiho tātaki rua,

he rōpū kāihe, he rōpū kāmera,

kia āta whakarongo mārie ia.”

8Kātahi tērā ka karanga, ānō he raiona:

“E tōku Ariki, kei runga ahau i te wāhi tūtei

e tū tonu ana i te awatea;

pau katoa anō ngā pō i ahau

e tū nei i tāku mahi tiaki.

9Nanā, tēnei te haere mai nei he rōpū tāngata,

me ngā kaieke hōiho, he tātaki rua!

Nā, ka oho ia, ka mea,

‘Kua horo a Papurōna, kua horo;

ko ngā whakapakoko katoa anō o ōna atua,

wāwāhia iho ki te whenua.’ ”

10E tāku patunga wīti,

e te wīti o tāku patunga;

ko tāku i rongo ai ki a Ihowā o ngā mano, ki te Atua o Īharaira,

e whakaaturia nei e ahau ki a koutou.

11Ko te poropititanga mō Rūma.

E karanga mai ana tētahi ki ahau i Heira,

“E te kaitūtei, ko te aha i te pō?

E te kaitūtei, ko te aha i te pō?”

12Ka kī mai te kaitūtei:

“Kei te haere mai te ata rāua ko te pō.

Ki te uia e koutou, e ui;

hoki mai, haere mai.”

13Ko te poropititanga mō Arāpia.

Kei te ngahere i Arāpia he nohoanga mō koutou i te pō,

e ngā tira haere o Reranimi.

14I kawea e rātou he wai mō te tangata e matewai ana;

i haere ngā tāngata o te whenua o Tema

ki te whakatau i ngā tāngata e rere ana, me tā rātou taro.

15Ka rere mai hoki rātou i ngā hoari,

i te hoari kua oti te unu,

i te kōpere kua oti te whakapiko,

i te pākaha anō o te whawhai.

16Ko tā te Ariki kupu hoki tēnei ki ahau: Kia kotahi tau, ko te tau hoki o te kaimahi, ā, ka poto katoa te korōria o Kerara.

17Nā, ko ngā mōrehu o ngā kaikōpere, ko ngā mārohirohi o ngā tama a Kerara, ka torutoru. Ko te kupu hoki tēnei a Ihowā, a te Atua o Īharaira.