Whakatauki 25 - Maori Bible 2012(MRI2012)

He Whakatauki anō nā Horomona

1He whakatauki anō ēnei nā Horomona, he mea tuhi e ngā tāngata a Hetekia kīngi o Hūrā.

2Ko tō te Atua whakakorōria, he huna mea;

ko tō ngā kīngi whakakorōria he rapu mea.

3Ko te rangi mō te tiketike, ko te whenua mō te hōhonu,

ā, ko te ngākau o ngā kīngi, tē taea te rapu.

4Tahia atu te para i te hiriwa,

ā, ka puta mai he oko mā te kaitahi para;

5tangohia atu te tangata kino i te aroaro o te kīngi,

ā, ka ū tōna torōna i runga i te tika.

6Kei whakaputa i a koe ki mua i te aroaro o te kīngi,

kei tū hoki ki te wāhi o ngā metararahi.

7He pai kē hoki kia kīia mai ki a koe, “Haere mai ki runga nei,”

i te mea kia whakahokia iho koe ki raro i te aroaro o te rangatira.

I kitea nei e ōu kanohi

8kei hohoro te haere ki te ngangare,

kei kore e kitea e koe tāu e mea ai i tōna mutunga iho,

ina meinga koe e tōu hoa kia whakamā.

9Tohea tāu tohe ki tōu hoa tonu,

ā, kaua e whākina te mea huna a tētahi:

10kei kohukohutia koe e te tangata i rongo,

ā, kore ake tōu ingoa kino e tahuri atu.

11He kupu i tika te kōrero,

ko tōna rite kei ngā āporo kōura i roto i ngā kete hiriwa.

12He pērā i te whakakai kōura, i te whakapaipai kōura parakore

koia anō te ako a te whakaaro nui ki te taringa rongo.

13Rite tonu ki te mātao o te hukarere i te kotinga wīti

te karere pono ki ōna kaingare;

ka ora hoki i a ia te ngākau o ōna ariki.

14He pērā i ngā kapua me te hau uakore,

koia anō te rite o te tangata e whakamanamana ana ki āna hākari horihori.

15Mā te roa e whakamanawanui ana ka whakaae mai ai te kīngi,

ā, mā te arero ngāwari ka mangungu ai te wheua.

16Kua kitea e koe he honi, kainga ko te wāhi e mākona ai koe;

kei kī rawa koe i taua mea, ka ruakina e koe.

17Kia takitahi tōu waewae ki te whare o tōu hoa;

kei hōhā ia ki a koe, ā, ka kino ki a koe.

18Ko te tangata e whakaatu teka ana mō tōna hoa,

he patu ia, he hoari, ā, he pere koi.

19Ko te whakawhirinaki ki te tangata tinihanga i te wā o te raru,

e rite ana ki te niho whati, ki te waewae kua takoki.

20Ko te tangata e waiata ana ki te ngākau pōuri,

e rite ana ki te tangata e whakarere ana i te kākahu i te rangi māeke,

ki te winika hoki i runga i te hōura.

21Ki te matekai tōu hoariri whāngaia ki te taro;

ki te matewai whakainumia ki te wai;

22ka pūrangatia hoki e koe he waro kāpura ki tōna māhunga,

ā, ka utua tāu e Ihowā.

23E mauria ana mai e te hauraro he ua;

e pērātia ana hoki e te arero ngautuarā, he kanohi pukuriri.

24He pai kē te noho i te kokonga o te tuanui,

i te noho tahi me te wahine ngangare i roto i te whare māhorahora.

25He rongo pai nō te whenua tawhiti,

tōna rite kei ngā wai mātao ki te wairua matewai.

26Me te manawa-whenua i takatakahia, me te puna i whakaparuparutia,

koia anō te tangata tika e hinga ana i te aroaro o te tangata kino.

27Ehara i te mea pai te kai nui i te honi;

waihoki ko ā te tangata rapu i tō rātou ake korōria ehara i te korōria.

28Ko te tangata e kore nei e pēhi i tōna wairua,

e rite ana ki te pā kua pakaru, kāhore ōna taiepa.