Hopa 21 - Maori Bible 2012(MRI2012)

Tērā e Kore te Hunga Kino e Whakawhiua

1Anō rā ko Hopa, i mea ia:

2“Āta whakarongo mai ki tāku kupu,

ā, hei tēnei he kupu whakamārie mai mā koutou.

3Tukua ahau, ā, ka kōrero hoki ahau;

ā, ka mutu āku kōrero, haere tonu tā koutou tāwai.

4“Ahau nei, ki te tangata koia tāku amuamu?

Ā, he aha ahau tē manawanui ai?

5Titiro mai ki ahau, mīharo ai;

kōpania atu te ringa ki te māngai.

6Mahara kau ahau, ka wehi,

mau pū te wehi o ōku kikokiko.

7He aha te hunga kino i ora ai, i koroheke ai,

āe, i mārohirohi ai tō rātou kaha?

8Pūmau tonu ō rātou uri ki tō rātou taha ki tō rātou aroaro,

ā, ko ā rātou whānau kei tā rātou tirohanga atu.

9Ō rātou whare kei runga i te rangimārie, kāhore he wehi,

kāhore hoki a te Atua patu ki a rātou.

10E kaha ana tāna pūru ki te ekeeke, kāhore hoki e hē;

ka whānau tāna kau, kāhore hoki he whakatahe.

11E tukua mai ana e rātou ā rātou kōhungahunga ānō he kāhui hipi,

e pekepeke ana ā rātou tamariki.

12He hunga hāpai rātou i te timipera, i te hāpa,

e koa ana ki te tangi o te ōkana.

13Ō rātou rā pau tonu i runga i te āhuareka,

kitea rawatia ake kua heke ki te pō.

14Koia rātou i mea ai ki te Atua, ‘Mawehe atu i a mātou;

kāhore hoki ō mātou hiahia kia mātau ki ōu ara.

15He aha rā te Runga Rawa e mahi ai mātou ki a ia?

He aha hoki te rawa ki a mātou ki te īnoi ki a ia?’

16Nanā, kāhore he pai mō rātou i ō rātou ringa ake:

matara atu i ahau te whakaaro o te hunga kino.

17“Pēhea te maha o ngā matenga o te rama a te hunga kino?

O ngā pānga mai anō hoki o tō rātou aituā ki a rātou?

O te tūwhanga mai a te Atua i ngā mamae i a ia e riri ana?

18E rite ai rātou ki te kakau wīti i mua i te hau,

ki te pāpapa e kāhakina atu ana e te paroro?

19E mea ana koutou, ‘E rongoātia ana e te Atua tōna kino hei mea mō āna tamariki.’

Māna e utu tērā ki a ia tonu, kia mōhio ai ia.

20Tukua kia kite ōna ake kanohi i tōna hunanga,

ā, tukua ia kia inu i te riri o te Kaha Rawa.

21He aha hoki tana manako ki tōna whare i muri i a ia,

ka poroa hoki ōna marama i waenga?

22“E whakaako ianei tētahi i te Atua ki te mātauranga?

Ko te kaiwhakawā hoki ia mō te hunga whakakake.

23Tēnei tangata, mate iho ia, pakari rawa anō hoki ōna kaha,

āta takoto ana āna mea katoa, kāhore hoki he raruraru.

24Kī tonu ōna ū i te waiū,

ā, e mākūkū ana ōna wheua i te hinu.

25Mate iho hoki tērā tangata, kawa tonu tōna wairua,

kāhore hoki he pai hei kai māna.

26Ka takoto ngātahi rāua ki te puehu,

ā, ko te iro hei hīpoki mō rāua.

27“Nanā, e mōhio ana ahau ki ō koutou whakaaro,

ki tā koutou ngārahu nanakia anō hoki mōku.

28E kī ana hoki koutou, ‘Kei hea te whare o te rangatira?

Kei hea hoki te tēneti i noho ai te hunga kino?’

29Kāhore ianei koutou i ui ki te hunga e haere atu ana i te ara?

Kāhore rānei koutou i mōhio ki ā rātou tohu?

30Kei te rongoā nei hoki te tangata kino mō te rā o te whakangaro;

ka whakaputaina rātou i te rā o te riri.

31Ko wai e whakaatu i tōna ara ki tōna aroaro?

Ko wai hoki hei hoatu i te utu mō tāna mahi ki a ia?

32Heoi, ka kawea ia ki te urupā;

kei te pūranga he wāhi mōna.

33Ka reka ki a ia ngā pōkuru o te awaawa,

ka whai mai anō hoki ngā tāngata katoa i a ia;

e kore nei hoki e taea te tatau te hunga i mua i a ia.

34“He pēhea rā tā koutou whakamārie tinihanga i ahau,

e toe nā hoki te hē i roto i ā koutou kupu e whakahoki mai nā?”