Ihāia 59 - Maori Bible 2012(MRI2012)

Ka Whakawātia e te Poropiti te Hara o te Iwi

1Nanā, kīhai i mutua te ringa o Ihowā, tē tau ai te whakaora;

kīhai anō i taimaha tōna taringa, tē rongo ai ia.

2Engari nā ō koutou hē i wehe

koutou ko tō koutou Atua,

nā ō koutou hara anō i hunā ai tōna mata ki a koutou,

tē whakarongo ai ia.

3Kua poke hoki ō koutou ringa i te toto,

ō koutou maihao i te hē;

ko ō koutou ngutu kua kōrero teka,

ko ō koutou arero kei te whakapuaki i te whanokē.

4Kāhore he karanga ki te tika,

kāhore he tohe ki te pono;

ko te horihori tō rātou okiokinga, e kōrero teka ana rātou;

ko tō rātou hapū he nanakia, whānau ake he kino.

5E paoa ana e rātou ngā hua o te neke,

e hangā ana e rātou te whare pūngāwerewere.

Ko te tangata e kai ana i ā rātou hua ka mate,

ā, ki te kōpēngia tētahi, ka puta he waipera.

6E kore ō rātou whare pūngāwerewere e tau hei kākahu,

e kore anō rātou e whai hīpoki i ā rātou mahi.

Ko ā rātou mahi he mahi nā te kino,

he mahi nanakia kei ō rātou ringa.

7E rere ana ō rātou waewae i te kino,

hohoro tonu hoki rātou ki te whakaheke i te toto harakore.

Ko ō rātou whakaaro he whakaaro ki te kino,

he whakamōtī, he wāwāhi kei ō rātou ara.

8Kāhore ō rātou mātauranga ki te ara o te rangimārie,

kāhore hoki he whakawā i ō rātou ara.

Ko ō rātou huarahi, whakakōpikopikoa ake e rātou;

ko te hunga katoa e haere ana nā reira,

e kore e mōhio ki te rangimārie.

9Nā reira matara noa atu te whakawā i a tātou,

tē mau tātou i te tika.

E tāria atu ana e tātou te mārama, nā, ko te pōuri;

te tīaho, nā, kei te haere nei tātou i te pōuri.

10E whāwhā ana tātou ki te taiepa ānō he matapō,

āe rā, me te mea ko te hunga kāhore he kanohi;

e tūtuki ana ō tātou waewae i te poutūmārōtanga me te mea i te ahiahi;

he rite tātou ki te tūpāpaku i roto i ngā tāngata pakari.

11Kei te ngengere tātou katoa ānō he pea;

ko tō tātou rite kei te kūkupa e tumutumu tonu ana.

E tatari ana tātou ki te whakawā, heoi kua kāhore;

ki te whakaora, otiia kei tawhiti atu i a tātou.

12Kua nui hoki ō mātou poka kē i tōu aroaro,

e whakaatu ana hoki ō mātou hara i tō mātou hē.

Kei a mātou nei hoki ō mātou poka kē,

ā, ko ō mātou kino, e mōhiotia ana ērā e mātou:

13he poka kē, he whakakāhore ki a Ihowā,

he peka atu i te whai i tō mātou Atua,

he whanokē ngā kōrero, he whakakeke;

kua hapū, kua puaki i te ngākau he kupu teka.

14Kua tahuri atu nei ki muri te whakawā,

ko te tika tū mai ana i tawhiti;

kua hinga hoki te pono i te waharoa,

ā, kāhore he tomokanga mō te tika.

15Āe rā, kua kore te pono;

ā, ko te tangata e whakarere ana i te kino

ka waiho hei taonga pārau.

Nā, ka kite a Ihowā, ka kino ki tāna titiro,

nō te mea kāhore he whakawā.

16Nā, titiro rawa mai ia, kāhore he tangata,

mīharo ana ia nō te mea kāhore he kaiwawao;

nā, kei tōna ringa he whakaora mōna;

ko tōna tika, nā tērā ia i tautoko ake.

17I kākahuria hoki e ia te tika hei pukupuku,

ko te whakaora hei pōtae ki tōna māhunga;

kākahuria ana e ia ngā kākahu o te rapu utu hei kākahu,

ropia mai ana te hae hei koroka.

18Ko tāna utu ka rite ki ā rātou mahi,

he riri ki ōna hoa whawhai,

he utu ki ōna hoariri;

ki ngā motu hoki ka hōmai e ia he utu.

19Nā, ka wehingia te ingoa o Ihowā i te uru,

tōna korōria i te rāwhiti.

Ka haere mai hoki ia ānō he awa e tāheke ana,

e āia ana e te manawa o Ihowā.

20“Ā, ka haere mai te kaihoko ki Hiona,

ki te hunga o Hākopa e tahuri atu ana i te poka kē,”

e ai tā Ihowā.

21“Ko ahau nei, ko tāku kawenata tēnei ki a rātou,” e ai tā Ihowā. “Ko tōku wairua i a koe nā, me āku kupu i hoatu e ahau ki tōu māngai, e kore e neke atu i tōu māngai, i te māngai o ōu uri, i te māngai anō o ngā uri o ōu uri,” e ai tā Ihowā, “āianei ā ake tonu atu.”