Whakatauki 23 - Maori Bible 2012(MRI2012)

1Ki te noho tahi kōrua ko te rangatira ki te kai,

āta whakaaroa mārietia tērā i tōu aroaro;

2whakapākia he māripi ki tōu korokoro,

ki te mea he tangata kakai koe.

3Kaua e hiahia ki āna mea reka;

he kai tinihanga hoki ērā.

4Kaua e tāruke ki te mea taonga;

kāti tāu mea ki tōu mātauranga.

5E anga mai rānei ōu kanohi ki taua mea korekore nei?

He pono hoki ka whai parirau te taonga,

koia ānō kei te ēkara, rere ana whaka te rangi.

6Kaua e kainga te kai a te tangata kanohi kino,

kei minamina hoki koe ki āna mea reka.

7Ko tāna hoki e mea ai i roto i a ia, pērā tonu ia,

“E kai, e inu!” koia tāna kupu ki a koe;

kāhore ia ōna ngākau ki a koe.

8Ko te kongakonga i kainga e koe, ka ruakina e koe,

ka maumauria anō hoki āu kupu reka.

9Kaua e kōrero ki ngā taringa o te kūware;

ka whakahāwea hoki ia ki te whakaaro nui o āu kupu.

10Kei whakanekehia e koe te rohe tawhito;

kei haere koe ki ngā māra a te pani;

11nō te mea he kaha tō rātou kaiwhakaora;

ka tohea e ia tā rātou tohe ki a koe.

12Anga atu tōu ngākau ki te ako,

me ōu taringa ki ngā kupu o te mātauranga.

13Kaua e tohungia te whiu ki te tamaiti;

ki te patua hoki ia e koe ki te rākau, e kore ia e mate.

14Tātātia ia e koe ki te rākau,

ā, ka whakaorangia e koe tōna wairua i te rēinga.

15E tāku tama, ki te whakaaro nui tōu ngākau,

ka koa hoki tōku ngākau, āe rā, tōku nei anō;

16āe rā, ka hari ōku whatumanawa,

ina kōrero ōu ngutu i ngā mea tika.

17Kei hae tōu ngākau ki te hunga hara;

engari kia wehi koe ki a Ihowā, ā pau noa te rā.

18He pono hoki tērā ānō he whakautu;

e kore anō hoki tāu i tūmanako ai e hātepea atu.

19Whakarongo rā, e tāku tama, kia whai whakaaro hoki koe,

ā, whakatikaia tōu ngākau i te ara.

20Kei uru ki te hunga kakai wāina;

ki te hunga pukukai kikokiko;

21nō te mea ka tutuki tahi te tangata inuinu rāua ko te tangata kakai ki te rawakore;

he tawhetawhe hoki te kākahu a te momoe mō te tangata.

22Whakarongo ki tōu pāpā nāna koe;

kaua hoki e whakahāwea ki tōu whaea ina rūruhi ia.

23Hokona te pono, kaua hoki e whakawhitiwhitia;

āe rā, te whakaaro nui, te ako hoki, me te mātauranga.

24Nui atu hoki te koa o te pāpā o te tangata tika;

ā, ko te tangata e whānau he tama whakaaro nui māna, ka hari ia ki a ia.

25Kia hari tōu pāpā rāua ko tōu whaea,

inā, kia koa te wahine i whānau ai koe.

26E tāku tama, hōmai tōu ngākau ki ahau,

kia manako anō hoki ōu kanohi ki āku ara.

27Nō te mea he rua hōhonu te wahine kairau;

he poka kūiti te wahine kē.

28Āe rā, ka whanga ia ānō he kaipāhua,

ā, ka whakatokomahatia e ia ngā tāngata poka kē.

29Ko wai e auē? Ko wai e tangi?

Ko wai e totohe? Ko wai e ngangautia?

Ko wai e marū, he mea takekore?

Ko wai e whero tonu ōna kanohi?

30Ko te hunga e noho roa ana ki te wāina;

ko te hunga e haere ana ki te rapu i te wāina whakaranu.

31Kaua e titiro ki te wāina i te mea e whero ana,

ina puta tōna kara i roto i te kapu,

ina mania tōna heke.

32Tōna tukunga iho ānō he nākahi e ngau ana,

koia anō kei te wero a te neke.

33E kite hoki ōu kanohi i ngā mea rerekē,

ā, ka puta he kupu rerekē i tōu ngākau.

34Āe rā, ka rite koe ki te tangata e takoto ana i waenga moana,

ki te tangata rānei e takoto ana i te tihi o te rewa.

35Ā, ka mea koe, “Patua ana ahau e rātou, ā, kīhai ahau i mamae;

tātātia ana ahau e rātou, ā, kīhai ahau i mōhio.

Āhea ahau ara ake ai?

Ka rapua anō e ahau.”