Waiata 66 - Maori Bible 2012(MRI2012)

He Hīmene WhakawhetaiKi te tino kaiwhakatangi. He hīmene, he waiata.

1Hāmama, e te whenua katoa, ki te Atua!

2Hīmenetia te korōria o tōna ingoa,

kia whai korōria te whakamoemiti ki a ia.

3Mea atu ki te Atua, “Anō te wehi o āu mahi!

Mā te nui o tōu kaha e ngohengohe ai ōu hoariri ki a koe.

4E koropiko katoa te whenua ki a koe;

ka hīmene ki a koe;

ka hīmene rātou ki tōu ingoa.” Hera

5Haere mai kia kite i ngā mahi a te Atua:

mataku rawa tāna mahi ki ngā tama a te tangata.

6Nāna i mea te moana hei tuawhenua;

haere ā-waewae ana rātou rā roto i te awa;

hari ana mātou ki a ia i reira.

7Ko tōna kāwanatanga tūturu tonu i runga i tōna kaha;

e titiro ana ōna kanohi ki ngā tauiwi;

kei whakakake te hunga tutū. Hera

8Whakapaingia tō tātou Atua, e ngā iwi;

kia rangona te reo whakamoemiti ki a ia.

9Nāna nei hoki i mau ai tō tātou wairua ki te ora,

kāhore hoki e tukua e ia ō tātou waewae kia nekehia.

10Kua whakamātauria hoki mātou e koe, e te Atua;

whakarewaia ana mātou e koe,

ānō he hiriwa e whakarewaia ana.

11Kua kawea nei mātou e koe ki roto ki te kupenga;

whakapīkaua ana e koe te mea whakamamae ki ō mātou hope.

12I meinga anō e koe ō mātou upoko kia ekengia hōihotia e te tangata;

i rā roto mātou i te kāpura, i te wai;

heoi whakaputaina mai ana mātou e koe ki te wāhi mōmona.

13Ka tomo ahau me ngā tahunga tinana ki tōu whare;

ka whakamana ahau i āku kupu taurangi ki a koe,

14ērā i puaki i ōku ngutu,

i kōrerotia e tōku māngai i ahau e pōuri ana.

15Ka whakaekea e ahau māu ngā mea mōmona hei tahunga tinana,

ngātahi anō me te mea kakara o ngā hipi toa;

ka tukua e ahau he pūru, he koati. Hera

16Haere mai, whakarongo, e koutou katoa e wehi ana ki te Atua,

ā, māku e whakapuaki tāna i mea ai ki tōku wairua.

17I tangi tōku māngai ki a ia;

i whakanuia anō ia e tōku arero.

18Ki te whakaaroa e tōku ngākau te hē,

e kore te Ariki e whakarongo mai.

19Nei rā he pono kua whakarongo te Atua,

kua tahuri ia ki tōku reo īnoi.

20Kia whakapaingia te Atua,

kīhai nei i whakapeau kē i tāku īnoi,

i tāna atawhai hoki ki ahau.