Ihāia 42 - Maori Bible 2012(MRI2012)

Te Pononga, he Mārama ki ngā Iwi

1“Nanā, tāku pononga e tautokona ake nei e ahau,

tāku i whiriwhiri ai, āhuareka tonu tōku ngākau ki a ia;

ka waiho e ahau tōku wairua ki runga ki a ia;

māna e whakapuaki te whakawā ki ngā tauiwi.

2E kore ia e hāmama, e kore anō tōna reo e ara,

e kore e rangona i te ara.

3Ko te kākaho kōpē e kore e whatia porokeretia e ia;

e kore hoki te muka whakapaowa e tineia e ia;

ka whakapuakina e ia te whakawā i runga i te pono.

4E kore ia e ngoikore, e kore e ngākaukore,

kia takoto rā anō i a ia te whakawā ki te whenua;

ka tatari anō ngā motu ki tāna ture.”

5Ko te kupu tēnei a te Atua, a Ihowā,

nāna nei ngā rangi i hanga, i hora;

nāna nei i takoto ai te whenua me ngā mea anō e puta mai ana i reira;

nāna nei i hōmai he manawa ki ō reira tāngata,

me te wairua anō ki te hunga e hāereere ana i reira:

6“He mea karanga koe nāku, nā Ihowā,

i runga i te tika, māku anō tōu ringa e pupuri,

māku koe e tiaki, ka hoatu anō koe e ahau hei kawenata ki te iwi,

hei mārama mō ngā tauiwi;

7hei whakatitiro i ngā kanohi matapō,

hei whakaputa mai i ngā herehere i roto i te whare e tūtaki tonu ana,

i te hunga e noho ana i te pōuri, i roto i te whare herehere.

8“Ko Ihowā ahau; ko tōku ingoa tēnā;

e kore anō e tukua e ahau tōku korōria ki tētahi atu,

tōku whakamoemiti ki te whakapakoko.

9Nanā, kua puta mai ngā mea ō mua,

he mea hou ēnei e whakaaturia nei e ahau;

i te mea kāhore anō kia pihi noa

ka kōrerotia nei e ahau ki a koutou.”

He Waiata Whakamoemiti

10Waiatatia ki a Ihowā he waiata hou,

me te whakamoemiti ki a ia i te pito o te whenua,

e te hunga e haere ana ki raro,

ki te moana, e ō reira tini mea, e ngā motu,

e ngā tāngata e noho ana i reira.

11Nō reira kia nui te reo o te koraha, o ngā pā anō o reira,

o ngā kāinga, e nohoia ana e Kerara;

kia waiata ngā tāngata o Hera,

kia hāmama rātou i runga i te tihi o ngā maunga.

12Kia whakakorōriatia a Ihowā e rātou,

kia kauwhautia te whakamoemiti ki a ia i ngā motu.

13Ka puta mai a Ihowā, ko te āhua kei tō te tangata mārohirohi;

ka whakaoho i te hae ka pērā i te tangata whawhai;

ka karanga, āe rā, ka hāmama;

ka kaha noa atu i ōna hoariri.

14“Ka roa nei tāku whakamorokitanga,

i whakarongo puku ahau, whakakoromaki tonu;

kātahi nei ahau ka auē, ka pērā me te wahine e whānau ana;

ka whakahotu ahau, ka kahekahe ngātahi.

15Ka whakaururuatia e ahau ngā maunga me ngā pukepuke,

ka maroke i ahau ngā otaota katoa o reira;

ka meinga ngā awa hei motu,

ka maroke anō i ahau ngā hārotoroto.

16Ka kawea anō e ahau ngā matapō mā te ara kīhai nei rātou i mōhio;

ka meinga te pōuri hei mārama ki tō rātou aroaro,

me ngā wāhi kōpikopiko kia tika.

Ka meatia ēnei mea e ahau ki a rātou,

e kore anō ahau e whakarere i a rātou.

17Ka hoki rātou ki muri, nui atu tō rātou whakamā,

tō te hunga e whakawhirinaki ana ki ngā whakapakoko,

e mea ana ki te mea whakarewa,

‘Ko koutou ō mātou atua.’

18“Whakarongo, e ngā turi;

titiro, e ngā matapō, kia kite ai koutou!

19Ko wai atu te matapō? Ko tāku pononga nei anake;

ko wai te turi hei rite mō tāku pononga i ungā nei e ahau?

Ko wai te matapō hei rite mō te tangata e mau nei tana rongo ki ahau?

Ko wai te matapō hei rite mō tā Ihowā pononga?

20He maha ngā mea e kitea ana e koe, heoi kāhore e mahara;

e puare ana ōna taringa, heoi kāhore e rongo.”

Te Whakakeke a Īharaira

21Pai tonu mai a Ihowā, he whakaaro ki tōna tika;

ka whakanuia e ia te ture, ka whakahōnoretia.

22Ko tēnei iwi ia he pāhuatanga, he taonga pārau;

he mea māhanga rātou katoa i roto i ngā rua,

ngaro tonu i roto i te whare herehere,

hei pāhuatanga rātou, kāhore hoki he kaiwhakaora;

hei taonga pārau; kāhore hoki he tangata e kī ana, “Whakahokia!”

23Ko wai i roto i a koutou e whai taringa ki tēnei?

Ko wai e mahara mai, e whakarongo mai, mō ngā wā hoki ō muri?

24Nā wai a Hākopa i tuku hei taonga pārau,

a Īharaira hoki hei meatanga mā ngā kaipāhua?

He teka ianei nā Ihowā?

Kua hara nei hoki tātou ki a ia,

kīhai hoki rātou i pai kia haere i āna ara,

kīhai i whakarongo ki tāna ture.

25Nā reira ringihia ana e ia te āritarita o tōna riri ki a ia,

me te pakanga kaha;

wera ana ia i tētahi taha, i tētahi taha, tē mōhio ia;

tahuna ana ia, heoi kīhai tōna ngākau i mahara.