Ihāia 11 - Maori Bible 2012(MRI2012)

Te Kīngitanga Rangimārie

1Ā, tērā e puta ake he wana i te take i a Hehe,

ā, ka whai hua tētahi peka e tupu ake i roto i ōna pakiaka.

2Ka noho hoki te Wairua o Ihowā ki runga ki a ia,

te wairua o te whakaaro nui, o te mātauranga,

te wairua o te whakatakoto whakaaro,

o te kaha, te wairua o te mōhio, o te wehi ki a Ihowā;

3ā, ko tāna e āhuareka ai ko te wehi ki a Ihowā.

E kore anō ia e whakawā i runga i tā ōna kanohi e kite ai,

e kore anō e whakaaro ki tā ōna taringa e rongo ai, ina rīria e ia te hē.

4Engari ka whakawā ia mō ngā rawakore i runga i te tika;

i runga anō i te tika tōna riri i te hē,

he whakaaro nōna ki te hunga māhaki o te whenua;

he whiu nā tōna māngai tāna patu mō te whenua,

ka whakamatea anō e ia te tangata kino ki te manawa o ōna ngutu.

5Ā hei whītiki te tika mō tōna hope,

hei whītiki anō te pono mō ōna whatumanawa.

6Ka noho tahi anō te wuruhi rāua ko te reme,

ka takoto tahi te reparo rāua ko te kūao koati;

ko te kūao kau, ko te kūao raiona, ko te mea mōmona, kotahi anō rōpū;

ā, mā te tamaiti iti rātou e ārahi.

7Ā, ka kai te kau rāua ko te pea,

ka takoto tahi anō hoki ā rāua kūao;

ā, ka rite te raiona ki te kau, ka kai i te kakau wīti.

8Ka tākaro hoki te tamaiti ngote ū i runga i te rua o te ahipi,

ā, ka pā atu te ringa o te tamaiti

kua whakamutua te kai ū ki te nohoanga o te neke.

9E kore rātou e tūkino, e kore anō e whakamate

puta noa i tōku maunga tapu;

nō te mea ka kapi te whenua i te mātauranga ki a Ihowā,

ānō ko ngā wai e taupoki nei i te moana.

Te Hokinga mai o te Toenga o Īharaira me Hūrā

10Nā, i taua rā ko tētahi pakiaka o Hehe, ka tū hei kara ki ngā iwi, ka rapua mai e ngā tauiwi; ko tōna okiokinga hoki, korōria rawa.

11I taua rā ka anga anō te ringa o te Ariki, ā, ka tuaruatia te whakahoki mai o ngā mōrehu o tāna iwi e mahue i Ahiria, i Īhipa, i Pātoro, i Kuhu, i Erama, i Hinara, i Hāmata, i ngā motu anō o te moana.

12Ka whakatūria anō e ia he kara ki ngā iwi,

ā, ka huihuia mai te hunga o Īharaira i peia atu,

ka whakaminea mai anō ngā mea o Hūrā i marara atu,

i ngā pito e whā o te whenua.

13Ka haere atu hoki te hae o Ēparaima,

ka hātepea atu anō hoki ngā hoariri o Hūrā;

e kore a Ēparaima e hae ki a Hūrā,

e kore anō a Hūrā e whakatoi ki a Ēparaima.

14Engari, ka rere iho rātou i runga i te pokohiwi o ngā Pirihitini i te taha ki te hauāuru,

ka pāhuatia ngātahitia e rātou te hunga o te rāwhiti.

Ka pā ō rātou ringa ki runga ki a Ēroma rāua ko Moapa;

ka whakarongo hoki ngā tama a Āmona ki a rātou.

15Ā, ka whakangaromia rawatia e Ihowā

te arero o te moana i Īhipa;

ā, he hau hunuhunu tāna e rūrū ai

i tōna ringa ki runga ki te awa,

e patu ai kia whitu ōna rerenga,

ā, ka meinga ngā tāngata kia whiti maroke noa atu.

16Ā, ka takoto he ara haerenga mai i Ahiria

mō ngā mōrehu o tāna iwi ka mahue;

ka rite anō ki tō Īharaira i te rā

i haere mai ai ia i te whenua o Īhipa.