Hōhea 2 - Maori Bible 2012(MRI2012)

1“Mea atu koutou ki ō koutou tuākana, ‘Ami,’ ki ō koutou tuāhine, ‘Ruhama.’ ”

Te Pūremu a Koma – Te Pūremu a Īharaira

2“Whakawākia tō koutou whaea, whakawākia,

ehara hoki ia i te wahine nāku,

ehara anō ahau i te tahu nāna.

Nā, kia whakarērea e ia ōna moepuku i tōna aroaro,

ōna pūremu i waenga ōna ū.

3Kei tangohia ōna e ahau, ā, ka noho tahanga ia,

kei meinga anō ia kia rite ki te rā i whānau ai ia;

kei meinga ia e ahau kia rite ki te koraha,

kei waiho ia hei whenua waikore,

ā, ka mate i te matewai.

4Āe rā, e kore āna tamariki e tohungia e ahau;

nō te mea he tamariki rātou nā te moepuku.

5Kua kairau nei hoki tō rātou whaea;

he mahi whakamā tā te wahine i whānau ai rātou.

I mea hoki ia, ‘Ka whāia e ahau te hunga i aroha ki ahau,

i hōmai nei i te taro māku, i te wai mōku,

i te huruhuru hipi māku, i te muka māku, i te hinu māku,

i te mea hei inu māku.’

6“Mō reira tēnei ahau te tūtaki nei i tōu ara ki te tātarāmoa,

te hanga nei i te taiepa e kore ai ia e kite i ōna ara.

7Ka whāia anō e ia āna i aroha ai,

heoi, e kore e mau i a ia;

ka rapua rātou e ia,

otiia e kore e kitea.

Kātahi ia ka mea ake, ‘Ka haere ahau

ka hoki ki tāku tahu tuatahi;

nui ake hoki tō reira pai ki ahau i tō nāianei.’

8Kīhai rā hoki ia i mōhio

nāku i hoatu te wīti ki a ia,

te wāina, me te hinu,

nāku anō i whakanui te hiriwa māna, me te kōura,

tā rātou i mahi nei hei mea mā Paara.

9“Mō reira ka hoki ahau,

ka tango i tāku wīti i tōna wā anō,

i tāku wāina i tōna wā anō,

ka riro anō i ahau tāku huruhuru hipi me tāku muka

i hīpokina ai ia i a ia e noho tahanga ana.

10Nā, ākuanei ka whakakitea e ahau

tāna mahi wairangi ki ngā kanohi o āna i aroha ai,

e kore anō tētahi tangata e whakaora i a ia i roto i tōku ringa.

11Ka mutu katoa anō i ahau tōna koa,

ōna rā hākari, ōna kōwhititanga marama, ōna hāpati,

me āna huihui nunui katoa.

12Ka ururua anō i ahau āna wāina, me āna piki,

ngā mea i kī ai ia,

‘Ko ōku utu ēnei,

he mea hōmai nā āku i aroha ai.’

Ā, ka meinga e ahau hei ngahere,

ā, ka kainga e ngā kīrehe o te pārae.

13Ka whiua anō ia e ahau mō ngā rā o ngā Paarimi,

mō ērā i tahu whakakakara ai ia ki a rātou;

ā, whakapaipai ana i a ia ki ōna whakakai,

ki āna whakapaipai, haere ana ki te whai i āna i aroha ai,

ā, wareware ake ki ahau,” e ai tā Ihowā.

14“Mō reira, nanā, ka whakawai ahau i a ia,

ka kawe i a ia ki te koraha,

ka kōrero whakamārie anō ki a ia.

15Ka hoatu anō e ahau ētahi māra wāina ki a ia i reira,

me te raorao o Ākoro hei kūwaha mō te tūmanako.

Ā, ka whakahoki kupu ia ki reira,

ka pērā me tō ngā rā o tōna tamarikitanga,

me tō te rā hoki i haere mai ai ia i te whenua o Īhipa.

16“Nā, i taua rā,” e ai tā Ihowā,

“ka karangatia ahau e koe, ‘E Ihi,’

e kore hoki ahau e karangatia e koe, ‘E Paari,’ ā muri ake nei.

17Nō te mea ka tangohia e ahau ngā ingoa o ngā Paarimi i roto i tōna māngai,

e kore anō rātou, ō rātou ingoa,

e maharatia ā muri ake nei.

18Ka whakaritea anō e ahau i taua rā he kawenata,

he pai mō rātou, ki ngā kīrehe o te pārae, ki ngā manu o te rangi, ki

ngā mea ngōkingōki o te oneone.

Ka whati anō i ahau te kōpere, te hoari,

te whawhai i runga i te whenua,

ā, ka meinga rātou e ahau kia au te takoto.

19Ka taumautia anō koe e ahau ā ake ake;

inā, ka taumautia koe e ahau māku i runga i te tika,

i te whakarite whakawā, i te aroha, i te atawhai.

20Ka taumautia anō koe māku i runga i te pono, ā, ka mōhio koe ki a Ihowā.

21“I taua rā ka whakarongo ahau,” e ai tā Ihowā,

“ka whakarongo ahau ki ngā rangi,

ka whakarongo rātou ki te whenua.

22Ka whakarongo anō te whenua ki te wīti, ki te wāina, ki te hinu;

ā, ka whakarongo ērā ki a Ietereere;

23ka whakatō anō ahau i a ia māku ki te whenua.

Ka tohu i tēnei kīhai nei i tohungia,

ka kī atu anō ki te hunga ehara nei i te iwi nāku, ‘ko koe tāku iwi,’

ā, ka mea ērā, ‘Ko koe tōku Atua.’ ”