Waiata 67 - Maori Bible 2012(MRI2012)

He Whakawhetai mō te KotingaKi te tino kaiwhakatangi: Nekinoto. He hīmene, he waiata.

1Mā te Atua tātou e atawhai, māna tātou e manaaki;

māna e mea kia tīaho tōna mata ki a tātou; Hera

2kia mātauria ai tāu ara ki runga ki te whenua,

tāu whakaoranga i roto i ngā tauiwi katoa.

3Kia whakamoemiti ngā iwi ki a koe, e te Atua,

kia whakamoemiti ngā iwi katoa ki a koe.

4Kia koa ngā tauiwi, kia waiata i te hari;

nō te mea ka tika tāu whakawā mō ngā iwi,

ā, ka kāwana koe i ngā tauiwi o te whenua. Hera

5Kia whakamoemiti ngā iwi ki a koe, e te Atua,

kia whakamoemiti ngā iwi katoa ki a koe.

6Kua tuku mai nei te whenua i ōna hua;

ā, ka manaaki te Atua, tō tātou Atua, i a tātou.

7Ka manaaki te Atua i a tātou;

ā, ka wehi ngā pito katoa o te whenua i a ia.