Hopa 22 - Maori Bible 2012(MRI2012)

Te Whakawhitinga Kōrero Tuatoru(22.1–27.23)

1Anō rā ko Eripāta Temani, i mea ia:

2“E whai pai anō rānei te Atua i te tangata?

He pono e whai pai te tangata i a ia anō ki te mea he ngākau mōhio tōna.

3He oranga ngākau rānei ki te Kaha Rawa tōu tika?

Hei taonga rānei ki a ia, ki te meinga e koe ōu ara kia tino tika?

4“He wehi rānei nōu i a ia i whakahē ai ia i a koe,

i whakawā ai i a koe?

5He teka ianei he nui tōu hē?

Kāhore hoki he pito whakamutunga o ōu kino.

6I tangohia noatia hoki e koe ngā mea a tōu teina hei taunaha,

huia ana e koe ngā kākahu o te hunga e noho tahanga ana.

7Kīhai i whakainumia e koe ki te wai te hunga ngenge;

kaiponuhia ana e koe he taro ki te hunga e matekai ana.

8Ko te tangata mārohirohi, i a ia te whenua;

ko te tangata hōnore, noho ana ia i reira.

9Ko ngā pouaru, ungā rawakoretia atu ana e koe,

whatiwhatiia ana ngā ringa o ngā pani.

10Nā reira, karapotia pūtia ana koe e ngā māhanga,

raruraru ana koe i te wehi pā whakarere;

11i te pōuri rānei, e kore ai koe e kite;

ā, nui atu te wai e taupoki nā i a koe.

12“He teka ianei kei te wāhi tiketike o te rangi te Atua?

Tirohia atu anō hoki a runga o ngā whetū, tō rātou teitei!

13Ā, e mea nā koe, ‘He aha tā te Atua e mōhio ai?’

E puta mai rānei tāna whakawā i roto i te kapua pōuri?

14Ko tōna wāhi ngaro ko ngā kapua mātotoru, tē kite ia;

kei te taiāwhio anō ia i ngā rangi.

15Ka mau tonu rānei koe ki te ara ō mua,

i haerea rā e ngā tāngata kikino?

16I kapohia atu nei i te mea kāhore anō i rite ō rātou rā;

tāhoroa ana tō rātou tūranga anō he awa.

17I mea nei ki te Atua, ‘Mawehe atu i a mātou’;

ā, ‘He aha e taea e te Kaha Rawa mō mātou?’

18Heoi, i whakakīia e ia ō rātou whare ki ngā mea papai,

ko te whakaaro ia o te hunga kino e matara atu ana i ahau.

19“E kite ana te hunga tika, ā, koa ana;

kataina iho rātou e te hunga harakore,

20me te kī, ‘He pono kua haukotia te hunga i tahuri mai ki a tātou,

pau ake i te ahi te toenga o rātou.’

21“Waiho ia hei hoa mōu, kātahi koe ka āta noho;

mā reira ka tae mai ai te pai ki a koe.

22Tahuri mai rā ki te ture a tōna māngai,

rongoātia hoki āna kupu ki roto ki tōu ngākau.

23Ki te hoki koe ki te Kaha Rawa, tērā koe e hangā;

ki te nekehia atu e koe te kino kia mamao i ōu tēneti.

24Ā, ka whakapūranga koe i tāu taonga ki te puehu,

te kōura o Ōpira ki waenga i ngā kōhatu o ngā awa;

25ā, ko te Kaha Rawa hei taonga mōu,

hei hiriwa utu nui ki a koe.

26Ko reira hoki koe āhuareka ai ki te Kaha Rawa,

ā, ka ara ake tōu mata ki te Atua.

27Ka īnoi anō koe ki a ia, ā, ka whakarongo mai ia ki a koe;

ka whakamanā anō e koe āu kupu taurangi.

28Ka whakatakotoria hoki e koe he tikanga,

ā, ka whakapūmautia ki a koe;

ka whiti anō te mārama ki runga ki ōu ara.

29Ki te makā koe e rātou ki raro, ka kī koe,

‘Tēnei anō he whakaarahanga ake’;

ka whakaorangia anō e ia te ngākau whakaiti.

30Ka whakaorangia e ia te tangata ahakoa ehara i te harakore;

āe rā, ka whakaorangia ia e te mā o ōu ringa.”