Āmoho 5 - Maori Bible 2012(MRI2012)

He Karanga ki te Rīpenetātanga

1Whakarongo ki tēnei kupu, kua maranga nei i ahau hei tangi ki a koutou, e te whare o Īharaira:

2“Kua hinga te wāhina a Īharaira,

e kore ia e ara i muri;

kua whakatakā ia ki runga ki tōna oneone;

kāhore he mea hei whakaara ake i a ia.”

3Nō te mea ko te kupu tēnei a te Ariki, a Ihowā:

“Ko te pā kotahi nei te mano i te haerenga atu,

kotahi rau e toe,

ā, ko tērā kotahi nei te rau i te haerenga atu,

kotahi tekau e toe ki te whare o Īharaira.”

4Ko te kupu hoki tēnei a Ihowā ki te whare o Īharaira:

“Rapua ahau, kia ora ai koutou;

5otiia, kaua e rapu i Pētēre,

kaua e haere ki Kirikara,

kaua anō e haere ki Peerehepa;

nō te mea tērā a Kirikara ka riro i te whakarau,

ā, hei kore noa iho a Pētēre.”

6Rapua a Ihowā, ā, ka ora koutou;

kei toro atu ia, ānō he ahi, i roto i te whare o Hōhepa,

ā, pau noa, ā, kore noa iho he kaitinei i roto i Pētēre.

7E te hunga i puta kē ai te whakawā hei taru kawa,

i tāia ai te tika ki te whenua.

8Rapua te kaihanga o Matariki, o Tautoru;

e riro kē ana i a ia te ātārangi o te mate hei ata,

e whakapōuritia ana e ia te rā hei pō;

e karangatia ana e ia ngā wai o te moana,

ā, ringihia ana e ia ki runga ki te mata o te whenua,

ko Ihowā tōna ingoa;

9nāna i whakaputa ohorere te whakangaromanga ki te hunga kaha,

i tae ai te whakangaromanga ki te pā kaha.

10E kinongia ana e rātou te kairiri hē i te kūwaha,

ā, he mea whakarihariha ki a rātou te tangata kōrero tika.

11Nā, i te mea he takahi tā koutou i te ware,

he tango i te takoha wīti i a ia;

he whare kōhatu tārai tā koutou i hanga ai,

nā, e kore e nohoia e koutou;

he māra wāina e minaminatia ana tā koutou i whakatō ai,

otiia e kore te wāina o aua māra e inumia e koutou.

12E mōhiotia ana hoki e ahau te maha o ō koutou poka kē,

me te kaha o ō koutou hara –

o koutou e whakatupu kino nei i te tangata tika,

e tango nei i te utu whakapati,

e whakangau kē nei i tā te rawakore i te kūwaha.

13Mō reira ka whakarongo puku te tangata tūpato i taua wā;

nō te mea he wā kino.

14Rapua te pai, kauaka hoki te kino,

kia ora ai koutou;

pēnei ko Ihowā, ko te Atua o ngā mano hei hoa mō koutou,

hei pēnā anō me tā koutou e kī nā.

15Kinongia te kino, arohaina te pai,

whakapūmautia te whakawā ki te kūwaha.

Tērā pea a Ihowā, te Atua o ngā mano,

ka aroha ki te toenga o Hōhepa.

16Mō reira tēnei kupu a Ihowā, a te Atua o ngā mano, a te Ariki:

“I ngā waharoa katoa ko te tangi;

ko tā rātou kupu i ngā huarahi katoa, ‘Auē! auē!’

Ka karangatia te kaingaki whenua ki te tangi,

me te hunga mātau ki te uhunga, hei auē;

17ā, he auē i ngā māra wāina katoa,

ka tika atu hoki ahau i waenganui i a koe,”

e ai tā Ihowā.

He Rā Pōuri te Rā o Ihowā

18Auē te mate mō koutou e hiahia nei ki te rā o Ihowā!

Hei aha mā koutou te rā o Ihowā?

He pōuri hoki, ehara i te mārama;

19ka pērā me te tangata i rere atu i te aroaro o te raiona,

ā, ka tūtaki te pea ki a ia;

i haere rānei ki roto ki te whare,

ā, okioki atu ana tōna ringa ki te pakitara,

nā, ngaua iho ia e te nākahi.

20He teka ianei tērā e pōuri te rā o Ihowā, e kore e mārama?

Tērā e pōuri kerekere, kāhore hoki he mārama i roto?

21“E kino ana ahau, e whakarihariha ana ki ā koutou hākari,

ā, e kore ahau e āhuareka ki ā koutou huihui nunui.

22Āe rā, ahakoa whakaeke noa koutou i ngā tahunga tinana,

i ā koutou whakahere totokore ki ahau,

e kore e manakohia e ahau.

E kore anō e tirohia e ahau ngā whakahere mō te pai,

arā ā koutou mea mōmona.

23Maua atu kia matara i ahau te ngangau o āu waiata;

e kore hoki ahau e whakarongo ki te rangi o āu hātere.

24Engari, kia huri mai te whakawā ānō he wai,

te tika ānō he awa nui.

25“I kawea mai koia e koutou ki ahau he patunga tapu,

he whakahere totokore, e te whare o Īharaira, i te koraha, i ngā tau e whā tekau?

26Āe rā, kua maua e koutou a Hikutu,

tō koutou kīngi, a Kiunu hoki, ā koutou whakapakoko,

te whetū o tō koutou atua,

i hangā nei e koutou mā koutou.

27Nā, ka whakaraua koutou e ahau ki kō atu i Ramahiku,”

e ai tā Ihowā nōna nei te ingoa, Ko te Atua o ngā Mano.