1 Whakapapa 24 - Maori Bible 2012(MRI2012)

Ngā Whakaritenga i ngā Tohunga

1Nā, ko ngā wehenga o ngā tama a Ārona koia ēnei.

Ko ngā tama a Ārona: ko Nātapa, ko Apihu, ko Ereātara, ko Itamara.

2I mate ia a Nātapa rāua ko Apihu ki te aroaro o tō rāua pāpā, kāhore hoki ā rāua tama; ā, nā Ereātara rāua ko Itamara i mahi ngā mahi a te tohunga.

3Nā, ka wehea rātou e Rāwiri rātou ko Hāroko o ngā tama a Ereātara, ko Ahimereke o ngā tama a Itamara, he mea whakarite ki ngā tikanga mā rātou mō ā rātou mahi.

4Nā, ka kitea he tokomaha rawa ngā tino tāngata o ngā tama a Ereātara i o ngā tama a Itamara, ā, ko tō rātou wehenga tēnei; o ngā tama a Ereātara kotahi tekau mā ono ngā tino tāngata o ngā whare o ō rātou mātua; o ngā tama a Itamara, o ngā whare o ō rātou mātua, tokowaru.

5Ko tō rātou wehenga hoki he mea rota, ko ēnei hui tahi ki ērā; ā, tērā ngā rangatira o te wāhi tapu, me ngā rangatira o te whare o te Atua nō ngā tama a Ereātara, nō ngā tama anō hoki a Itamara.

6He mea tuhituhi rātou nā Hemaia karaipi, tama a Netanēre, o ngā Rīwaiti, ki te aroaro o te kīngi, o ngā rangatira, o Hāroko tohunga rāua ko Ahimereke tama a Apiātara, ki te aroaro anō o ngā upoko o ngā whare o ngā mātua o ngā tohunga, o ngā Rīwaiti; kotahi whare mātua i riro mō Ereātara, kotahi i riro mō Itamara.

7Nā, ko te putanga o te rota tuatahi, nō Tehoiaripi; ko te tuarua nō Irāia,

8ko te tuatoru nō Hārimi, ko te tuawhā nō Heorimi,

9ko te tuarima nō Marakia, ko te tuaono nō Mīamini,

10ko te tuawhitu nō Hakoto, ko te tuawaru nō Apia,

11ko te tuaiwa nō Hehua, ko te tekau nō Hekania,

12ko te tekau mā tahi nō Eriahipi, ko te tekau mā rua nō Iākimi,

13ko te tekau mā toru nō Hupa, ko te tekau mā whā nō Iehepeapa,

14ko te tekau mā rima nō Pirika, ko te tekau mā ono nō Imere,

15ko te tekau mā whitu nō Hetiri, ko te tekau mā waru nō Apahehe,

16ko te tekau mā iwa nō Petahia, ko te rua tekau nō Ehekiere,

17ko te rua tekau mā tahi nō Iakini, ko te rua tekau mā rua nō Kamuru,

18ko te rua tekau mā toru nō Teraia, ko te rua tekau mā whā nō Maatia.

19Ko ngā tikanga ēnei mō rātou, mō ā rātou mahi, mō te tomo ki te whare o Ihowā, i runga i te ritenga mō rātou, i whakaritea e tō rātou pāpā, e Ārona, ko tā Ihowā, ko tā te Atua o Īharaira i whakahau ai ki a ia.

Te Rārangi o ngā Rīwaiti

20Nā, ko ērā atu o ngā tama a Rīwai: o ngā tama a Āmarama, ko Hupaere; o ngā tama a Hupaere, ko Iehereia.

21Nā, ko a Rehāpia: o ngā tama Rehāpia, ko te tuatahi ko Ihīa.

22O ngā Itihari: ko Heromoto; o ngā tama a Heromoto: ko Iahata.

23Nā, ko ngā tama a Heperona: ko Teria te tuatahi, ko Amaria te tuarua, ko Tahatiere te tuatoru, ko Tekameama te tuawhā.

24O ngā tama a Utiere: ko Mika; o ngā tama a Mika, ko Hāmiri.

25Ko te teina o Mika: ko Ihīa; o ngā tama a Ihīa: ko Hakaraia.

26Ko ngā tama a Merari: ko Māhari, ko Muhi. Ko ngā tama a Taatia: ko Peno.

27Ko ngā tama a Merari: arā a Taatia: ko Peno, ko Hōhama, ko Tākuru, ko Ipiri.

28Nā Māhari: ko Ereātara; ā, kāhore a tēnei tama.

29Nā, ko a Kihi, ko te tama a Kihi: ko Ierameere.

30Ko ngā tama anō a Muhi: Māhari, ko Ērere, ko Terimoto.

Ko ngā tama ēnei a ngā Rīwaiti, nō ngā whare o ō rātou mātua.

31I maka rota anō ēnei i pērā me ō rātou tuākana, me ngā tama a Ārona i te aroaro o Kīngi Rāwiri, o Hāroko anō rāua ko Ahimereke, o ngā upoko anō o ngā whare o ngā mātua o ngā tohunga, o ngā Rīwaiti, arā o ngā tino mātua i te ritenga o ō rātou tēina.