Whakatauki 1 - Maori Bible 2012(MRI2012)

1Ko ngā whakatauki a Horomona tama a Rāwiri, kīngi o Īharaira.

Te Painga o ngā Whakatauki

2E mōhiotia ai te whakaaro nui, te ako,

e kitea ai ngā kupu o te mātauranga,

3e riro mai ai te ako a te ngākau mahara,

te tika, te whakawā, te mea anō e rite ana.

4Hei hoatu i te ngākau tūpato ki ngā kūware,

i te mātauranga, i te ngārahu pai ki te taitamariki.

5Kia whakarongo ai te tangata whakaaro nui, kia nui ake ai tōna mōhio;

kia whiwhi ai te tangata tūpato ki ngā whakaaro mōhio;

6e mōhio ai ia ki te whakatauki, ki te kupu whakarite,

ki ngā kupu a ngā whakaaro nui, ki ā rātou kōrero whakapeka.

7Ko te wehi ki a Ihowā te tīmatanga o te mātauranga;

e whakahāwea ana te whakaarokore ki te whakaaro nui, ki te ako.

He Tohutohu ki ngā Taiohi

8Whakarongo, e tāku tama, ki te ako a tōu pāpā,

kaua hoki e whakarērea te ture a tōu whaea;

9ka waiho hoki ēnā hei pare ātaahua mō tōu mātenga,

hei mekameka whakapaipai mō tōu kakī.

10E tāku tama, ki te whakawaia koe e te hunga hara,

kaua e whakaae.

11Ki te mea rātou, “Tātou ka haere, ka whakapapa atu, ka whakaheke toto;

kia whanga puku tātou, he mea takekore, mō te tangata harakore;

12horomia oratia rātou e tātou, pērātia me tā te rua tūpāpaku;

ka riro tinana rātou, ka pērā me te hunga e heke atu ana ki te poka.

13Ka kitea e tātou ngā taonga utu nui katoa;

ka whakakīia ō tātou whare ki tā tātou e pāhua ai.

14Makā mai tōu wāhi ki roto ki tō mātou;

kia kotahi te pūtea mā tātou katoa” –

15e tāku tama, kaua e haere tahi i te ara me rātou,

kaiponuhia tōu waewae i tō rātou huarahi;

16e rere ana hoki ō rātou waewae ki te kino,

e hohoro ana rātou ki te whakaheke toto.

17He maumau hoki te hora o te kupenga

ki te tirohanga a tētahi manu;

18ko rātou, he whakaheke i ō rātou toto anō i whakapapa ai rātou;

he whakamate i a rātou anō i piri ai rātou.

19Ka pēnā ngā huarahi o te hunga apo taonga;

ko te ora anō o ōna rangatira e tangohia.

Te Karanga o te Whakaaronui

20E hāmama ana te whakaaro nui i te huarahi;

e puaki ana tōna reo i ngā waharoa.

21E karanga ana ia i te tino wāhi whakaminenga;

i te wāhi tuwhera o ngā kūwaha, i roto i te pā, e puaki ana āna kupu:

22“E te hunga kūware, kia pēhea ake te roa

o tō koutou aroha ki te kūwaretanga?

O te hiahia rānei o te hunga whakahī

ki tō rātou whakahī?

O te whakakino rānei a te hunga wairangi ki te mātauranga?

23Tahuri mai ki tāku ako;

nā, ka ringihia e ahau tōku wairua ki a koutou,

ka whakaaturia āku kupu ki a koutou.

24I karanga atu hoki ahau, heoi kīhai koutou i pai mai;

i totoro atu tōku ringa, ā, kīhai tētahi i whai whakaaro mai;

25heoi, whakakāhoretia iho e koutou tōku whakaaro katoa,

kīhai hoki i aro ki tāku ako.

26Mō reira ka kata ahau i te rā o tō koutou aituā;

ka tāwai ina pā te pāwera ki a koutou;

27ina tae mai tō koutou pāwera ānō he tūpuhi,

ā, ka pā mai tō koutou aituā ānō he paroro;

ina tae mai te pōuri me te ngākau mamae ki a koutou.

28“Ko reira rātou karanga ai ki ahau, ā, e kore ahau e whakahoki kupu atu;

ka rapu nui rātou i ahau, otiia e kore ahau e kitea e rātou.

29Mō rātou i kino ki te mātauranga;

kīhai hoki i whiriwhiria e rātou te wehi ki a Ihowā;

30kīhai i aro mai ki ōku whakaaro;

whakahāwea ana rātou ki tāku kupu riri katoa,

31nā reira ka kai rātou i ngā hua o tō rātou nei ara,

ka whakakīia anō hoki ki ngā mea i titoa e rātou.

32Ko te tahuritanga atu hoki o ngā kūware hei patu i a rātou;

ko te ngākau warea anō hoki o ngā wairangi hei huna i a rātou.

33Ko te tangata ia e rongo ana ki ahau,

ka au tōna noho, ka ātea hoki i te wehi ki te kino.”