Heremaia 30 - Maori Bible 2012(MRI2012)

Ka Whakahuatia te Whakahokinga o Īharaira me Hūrā

1Ko te kupu i puta mai ki a Heremaia, he mea nā Ihowā, i mea ia:

2“Ko te kupu tēnei a Ihowā, a te Atua o Īharaira, e mea ana: Tuhituhia ki te pukapuka ngā kupu katoa i kōrerotia e ahau ki a koe.

3Tēnei ake hoki ngā rā,” e ai tā Ihowā, “e whakahokia mai ai e ahau tāku iwi, a Īharaira rāua ko Hūrā, i te whakarau,” e ai tā Ihowā; “ā, ka whakahokia mai rātou e ahau ki te whenua i hoatu e ahau ki ō rātou mātua, ā, ka riro a reira i a rātou.”

4Ā, ko ngā kupu ēnei i kōrerotia e Ihowā mō Īharaira rāua ko Hūrā:

5Ko te kupu hoki tēnei a Ihowā:

“Kua rongo tātou i te reo o te tūiri,

o te wehi, ehara i te rongo mau.

6Tēnā rā, ui atu, kia kite ai koutou?

He whānau tamariki rānei tā te tāne?

He aha ahau i kite ai i ngā tāngata katoa

ko ō rātou ringa kei ō rātou hope,

koia anō kei te wahine e whānau ana,

kua puta kē anō ngā kanohi katoa, kua kōmā?

7Auē! He rā nui hoki taua rā,

kāhore he rite mōna.

Ko te wā hoki ia o tō Hākopa mamae;

otiia ka whakaorangia ia i taua mamae.

8“Nā, i taua rā,” e ai tā Ihowā o ngā mano,

“ka wāhia e ahau tāna ioka i tōu kakī,

ka motuhia hoki ōu here;

e kore hoki ia e whakamahia e ngā tāngata kē i muri iho.

9Engari, ka mahi rātou ki a Ihowā, ki tō rātou Atua,

ki a Rāwiri hoki, ki tō rātou kīngi

e whakaarahia ake e ahau mō rātou.

10“Nā reira kaua e wehi, e tāku pononga, e Hākopa,” e ai tā Ihowā,

“kaua hoki e pāwera, e Īharaira.

Nanā, ka whakaora hoki ahau i a koe i tawhiti,

i ōu uri anō i te whenua i whakaraua atu ai rātou;

ā, ka hoki mai a Hākopa, ka āta noho, ka whai tānga manawa,

tē ai he kaiwhakawehi mōna.

11Nō te mea hei hoa ahau mōu,”

e ai tā Ihowā, “hei whakaora i a koe;

ka poto rawa hoki i ahau ngā iwi katoa

kua whakamararatia atu nā koe ki reira,

otiia e kore koe e poto rawa i ahau;

engari ka pākia koe e ahau,

he mea whakarite mārie atu,

e kore anō hoki koe e tukua kia kāhore rawa e whiua.”

12Ko te kupu hoki tēnei a Ihowā:

“Ko tōu pakaru e kore e mahu,

he mamae rawa tōu marūtanga.

13Kāhore he tangata hei tohe i tāu,

kia takaia ai koe;

kāhore ōu rongoā whakamahu.

14Ko te hunga katoa i aroha ki a koe kua wareware ki a koe;

kāhore rātou e rapu i a koe;

nō te mea i patua koe e ahau ki te patu a te hoariri,

ki te whiu hoki a te tangata nanakia;

he nui hoki nō tōu kino,

he maha nō ōu hara.

15He aha koe i tangi ai ki tōu pakaru?

E kore tōu mamae e taea te rongoā.

Mō te nui hoki o tōu kino,

he maha nō ōu hara,

i meinga ai e ahau ēnei mea ki a koe.

16“Nā reira ko te hunga katoa e kai ana i a koe, ka kainga rātou;

ko ōu hoariri katoa, ko rātou katoa, ka riro ki te whakarau;

ko te hunga e pāhua ana i a koe ka pāhuatia rātou,

ā, ka tukua e ahau hei taonga pārau te hunga katoa e muru ana i a koe.

17Ka whakahokia atu hoki e ahau te ora ki a koe,

ka rongoātia e ahau ōu marūtanga,”

e ai tā Ihowā;

“nō te mea kua kīia koe e rātou, he peinga,

kua mea: ‘Ko Hiona tēnei e kore nei e rapua e te tangata.’ ”

18Ko te kupu tēnei a Ihowā:

“Nanā, ka whakahokia mai e ahau i te whakarau ngā tēneti o Hākopa,

ka aroha ki ōna nohoanga;

ā, ka hangā te pā ki runga ki tōna pūranga anō,

ka whakapūmautia anō ngā tikanga o te whare kīngi.

19Ka puta mai anō i reira te whakamoemiti,

me te reo o te hunga e kata ana:

ā, ka whakanuia rātou e ahau, e kore rātou e torutoru;

ka whakakorōriatia hoki rātou e ahau, ā, e kore rātou e iti.

20Ā, ka rite ā rātou tamariki ki ō mua;

ka whakapūmautia hoki tō rātou whakaminenga ki tōku aroaro,

ā, ka whiua e ahau te hunga katoa e tūkino ana i a rātou.

21Ā, ko tō rātou metararahi ko tētahi anō o rātou,

ka puta ake hoki tō rātou kāwana i roto i a rātou;

ā, ka meinga ia e ahau kia whakatata mai,

ā, ka haere mai ia ki ahau;

ko wai oti tēnei kua toa nei ki te haere mai ki ahau?”

e ai tā Ihowā.

22“Ā, hei iwi koutou māku,

ko ahau hoki hei Atua mō koutou.”

23Nanā, ko te tūkauati a Ihowā,

arā ko tōna riri mura tonu,

te paoho atu nā, he tūkauati e tahi ana:

tērā e āki ki runga ki te māhunga o te hunga kino.

24E kore e tahuri atu te riri kino o Ihowā,

kia oti rā anō i a ia, kia whakapūmautia rā anō e ia

ngā whakaaro o tōna ngākau.

I ngā rā whakamutunga ka mātau koutou.