1I taua wā ka tukua mai he pukapuka me tētahi hākari ki a Hetekia e Meroraka Pararana, tama a Pararana kīngi o Papurōna; i rongo hoki i te mate ia, ā, kua ora.
2Ā, koa tonu a Hetekia ki a rātou, whakakitea ana e ia ki a rātou te whare o āna mea papai, te hiriwa, te kōura, ngā kīnaki kakara, te hinu pai, me te whare katoa o āna mea mō te whawhai, me ngā mea katoa i rokohanga ki roto ki ōna taonga; kāhore tētahi mea o tōna whare, o tōna kīngitanga katoa, i kore te whakakitea e Hetekia ki a rātou.
3Kātahi a Ihāia poropiti ka haere ki a Kīngi Hetekia, ka mea ki a ia, “I pēhea mai ēnei tāngata? I haere mai hoki rātou i hea ki a koe?”
Anō rā ko Hetekia, “I haere mai rātou ki ahau, i te whenua hoi, i Papurōna.”
4Anō rā ko tērā, “Ko ēhea mea i kitea e rātou i roto i tōu whare?”
Ka mea a Hetekia, “Kua kitea e rātou ngā mea katoa i tōku whare. Kāhore tētahi mea i roto i ōku taonga i kore te whakakitea e ahau ki a rātou.”
5Nā, ka mea a Ihāia ki a Hetekia, “Whakarongo ki te kupu a Ihowā o ngā mano:
6Nanā, kei te haere mai ngā rā e kawea ai ki Papurōna ngā mea katoa o tōu whare, me ngā mea kua rongoātia nei e ōu mātua ā taea noatia tēnei rā. E kore tētahi mea e mahue, e ai tā Ihowā.
7Ka tangohia anō e rātou ētahi o āu tama e puta mai i a koe, e whānau nei māu, ā, hei unaka rātou ki te whare o te kīngi o Papurōna.”
8Anō rā ko Hetekia ki a Ihāia, “Pai tonu te kupu a Ihowā i kōrerotia nā e koe.” I mea hoki ia, “Ka mau hoki te rongo me te pono i ōku rā.”
Who We AreWhat We EelieveWhat We Do
2025 by iamachristian.org,Inc All rights reserved.
