UJakhobe Isingeniso - Ndebele Contemporary Bible 2022
IsingenisoIsingenisoUJakhobe omunye wabafowabo bakaJesu waba ngomunye wabakhokheli eJerusalema ngemva kokufa lokuvuka kukaJesu. Wayehlonitshwa kakhulu ngezixwayiso zakhe kanye lezahlulelo zakhe ezasiza amakholwa ukuthi enze izinto ngokuhlakanipha (bona Imisebenzi 15.13-21). UJakhobe wabona kufanele ukuthi abhale imfundiso kanye lezixwayiso zakhe athumele amanye amakholwa esiJuda ayekuzo zonke izindawo embusweni waseRoma. Lokho ababhalela khona yikho esesikwazi njengogwalo lukaJakhobe.Ugwalo lolu luqala njengencwadi ngoba lwaluzathunyelwa ebantwini ababekhatshana. Kodwa kayinjengezinye izincwadi zakulezo nsuku. Yizitsho ezimfitshane lengxoxo ezithile mayelana lokuphila kwansukuzonke. Indlela elotshwe ngayo, kuhlanganisa ingxoxo ezimfitshane lezitsho lokungenana kwendaba okuphosa kufanane lokulotshwa kweZaga loMtshumayeli.Njengokulotshwa kwamazwi okuhlakanipha, uJakhobe ukhangela imibuzo eqondane lokuphila kwansukuzonke ebantwini bakaNkulunkulu abahle. Utshengisa ukuqakatheka kokunakekela abayanga, ukusebenzisa inotho ngendlela enhle, ukukhuza ulimi, ukuphila okumsulwa, ukubambana kwabalandeli bakaKhristu, ngaphezu kwakho konke ukubekezela lokuma ngezikhathi zokulingwa. Izixwayiso lezi ezilokuhlakanipha okungaka kusaqakathekile lanamhla ukucebisa lokukhokhela njengendlela okwakuqakatheke ngakho uJakhobe ebhala.
