UHosiya 7 - Ndebele Contemporary Bible 2022

1Lapho engizakwelapha khona u-Israyeli,

izono zika-Efrayimi ziyadalulwa

lobubi beSamariya buyembulwa.

Benza inkohliso,

amasela agqekeza izindlu,

izigebenga ziyaphanga emigwaqweni

2kodwa kabananzeleli

ukuthi mina ngiyazikhumbula zonke izenzo zabo ezimbi.

Izono zabo ziyabaminza;

zihlezi ziphambi kwami.

3Bathokozisa inkosi ngobuxhwali babo,

lababusi ngamanga abo.

4Bonke bayizifebe,

batshisa njengeziko

elimlilo walo akudingeki ukuba umpheki wezinkwa awukhwezele

kusukela ekuvoxeni inhlama ize ikhukhumale.

5Ngosuku lomkhosi wenkosi yethu

ababusi bathukutheliswa liwayini,

inkosi izihlanganise labaklolodayo.

6Inhliziyo zabo zinjengeziko,

inkosi bayilanda ngamacebo ensitha.

Ukufutheka kwabo kuyadeda ubusuku bonke;

ekuseni kuyavutha njengomlilo obhebhayo.

7Bonke batshisa njengeziko;

batshwabadele ababusi babo.

Wonke amakhosi abo ayawa,

kayikho ekhuleka kimi.

8U-Efrayimi uxubana lezizwe;

u-Efrayimi ulikhekhe eliyisicecedu elingaphendulwanga.

9Abezizweni bacikiza amandla akhe,

kodwa yena kakunanzeleli.

Inwele zakhe sezilezimvu

kodwa yena kakunanzeleli.

10Ubuqholo buka-Israyeli bufakaza okubi ngaye,

kodwa phezu kwakho konke lokhu

kabuyeli kuThixo uNkulunkulu wakhe

loba amdinge.

11U-Efrayimi unjengejuba,

ukhohliseka lula kalangqondo

ucela usizo eGibhithe,

abuye alucele e-Asiriya.

12Lapho sebehamba, ngizaphosa umambule wami phezu kwabo;

ngizabadonsela phansi njengezinyoni zasemoyeni.

Ngizabezwa behamba bonke,

ngizababamba.

13Maye kubo

ngoba bedukile kimi!

Akube lencithakalo kubo

ngoba bangihlamukele!

Ngiyafisa ukubahlenga

kodwa bona bakhuluma amanga ngami.

14Kabakhalazi kimi ngezinhliziyo zabo

kodwa bakhalela emibhedeni yabo.

Babuthanela amabele lewayini elitsha

kodwa mina basuka bangidele.

15Ngabafundisa ngabaqinisa,

kodwa baceba okubi ngami.

16Kabaphendukeli koPhezukonke

banjengedandili elisolekayo.

Abakhokheli babo bazabulawa ngenkemba

ngenxa yamazwi abo okweyisa.

Ngalokhu bazahlekwa

elizweni laseGibhithe.”