AmaHubo Isingeniso - Ndebele Contemporary Bible 2022
IsingenisoIsingenisoUgwalo lwamaHubo liqoqo lamazwi ezingoma. Njengezingoma ezinengi, zalotshwa ekuqaleni ngabalobi abathile bebhala ngezehlakalo ababehlangane lazo ezimpilweni zabo. Ngokuya kwesikhathi, abantu bonke baqala ukuzisebenzisa bedumisa. Kwathi abako-Israyeli bevela ekuthunjweni yiBhabhiloni, izingoma ezinengi ezazibhalwe eminyakeni edlula amakhulu ambalwa aqoqwa ndawonye ukuze enze ugwalo lwamaHubo.Ugwalo luyizigaba ezinhlanu eziphela ngamazwi athi Udumo kalube kuThixo Ameni, Ameni. “Ingwalo” ezinhlanu lezi zikhumbuza obalayo ngengwalo zikaMosi ezinhlanu. Njengemilayo, amazwi ezingoma la angabalwa ukuze umuntu athole izeluleko. Isahluko sakuqala samaHubo sigcizelela ukujulisa ingqondo, kukhanya safakwa ekuqaleni kogwalo ngalesosizatho.Ingwalo ezinhlanu lazo zisitshela ngodaba lokuhlengwa kwabako-Israyeli ngezigaba ezintathu: umbuso wamakhosi, ukuthunjwa lokuphenduka kwabo. AmaHubo alotshwa yinkosi uDavida yiwo amanengi egwalweni lwakuqala lolwesibili. Ukuqala lokuphetha kogwalo lwesithathu kuveza ukuthunjwa kuka-Israyeli. Ugwalo lwesine luphela ngokucela uNkulunkulu ukuthi akhulule u-Israyeli amkhiphe ekuthunjweni ambuyisele elizweni lakhe. Ugwalo lwesihlanu luphawula ukuthi uNkulunkulu wakwenza kanjalo. Ngakho isizatho sokufaka amahubo okubonga ekucineni sisobala: UNkulunkulu utshengise ukuthembeka kwakhe ku-Israyeli ngokuvumela ukuthi bathunjwe lokubuya amkhiphe ekuthunjweni emletha elizweni lakhe.Ugwalo lwamaHubo lusebenza kabili: ingoma inye ngayinye iveza indlela ezehlukeneyo zomoya othembekileyo kuNkulunkulu, kuthi-ke iqoqo lonke litshengisa lokuthakazelela izenzo zikaNkulunkulu esindisa abantu bakhe.
