AmaHubo 71 - Ndebele Contemporary Bible 2022

1Kuwe Thixo, sengithole isiphephelo;

mangingayangiswa lanini.

2Ngihlenga ungikhulule ngokulunga kwakho;

ngilalela, woza ngokuphangisa ungisindise.

3Woba lidwala lami lokuphephela,

lapho engingaya khona loba nini;

tshono umlayo wokuba ngisindiswe,

ngoba ulidwala lami lenqaba yami.

4Ngikhulula, Oh Nkulunkulu, esandleni sababi,

emandleni abantu ababi abalochuku.

5Ngoba ube ulithemba lami, Oh Thixo Wobukhosi,

ithemba lami kusukela ebutsheni bami.

6Kusukela ekuzalweni kwami ngahle ngeyama kuwe;

nguwe owangikhuphayo esiswini sikamama.

Ngizakudumisa njalonjalo.

7Senginjengomhlolo kwabanengi,

kodwa wena uyisiphephelo sami esiqinileyo.

8Umlomo wami ugcwele udumo lwakho,

umemezela inkazimulo yakho ilanga lonke.

9Ungangilahleli kude nxa sengiluphele;

ungangifulatheli lapho amandla ami esephelile.

10Ngoba izitha zami zikhuluma kubi ngami;

labo abalindele ukungibulala bahlangana ngami.

11Bathi, “UNkulunkulu usemlahlile;

xotshanani laye limbambe,

ngoba kakho ozamlamulela.”

12Ungabi khatshana kwami, Oh Nkulunkulu;

woza masinyane, Oh Nkulunkulu wami, uzongisiza.

13Sengathi labo abangethesa amacala

bangabhubha beyangekile;

sengathi labo abafuna ukungilimaza

bangabhixwa ngehlazo lokuyangeka.

14Kodwa mina ngizahlala ngithembile;

ngizakudumisa kakhulu.

15Umlomo wami uzafakaza ngokulunga kwakho,

langensindiso yakho ilanga lonke,

lokuba ngingasazi isilinganiso sayo.

16Ngizakuza ngifakaze ngemisebenzi yakho emikhulu,

Oh Thixo Wobukhosi;

ngizafakaza ngokulunga kwakho, okwakho wedwa.

17Kusukela ebutsheni bami, Oh Nkulunkulu, wangifundisa,

kuze kube lamuhla ngimemezela

imisebenzi yakho emangalisayo.

18Lokuba sengiluphele sengiyimpunga

ungangideli, Oh Nkulunkulu,

ngize ngifakaze ngamandla akho esizukulwaneni esizayo,

amandla akho kubo bonke abalandelayo.

19Ukulunga kwakho kufika emkhathini, Oh Nkulunkulu,

wena osuwenze izinto ezinkulu.

Ngubani, Oh Nkulunkulu, onjengawe?

20Loba usungenze ngabona inhlupheko

ezinengi lezibuhlungu,

uzangenyula njalo ekujuleni komhlabathi.

21Uzalwandisa udumo lwami

ungiduduze futhi njalo.

22Ngizakudumisa ngechacho

ngenxa yokuthembeka kwakho,

Nkulunkulu wami;

ngizahlabelela indumiso kuwe ngomqangala,

wena oNgcwele ka-Israyeli.

23Izindebe zami zizamemeza ngentokozo

lapho ngihlabelela indumiso kuwe

mina ongisindisileyo.

24Ulimi lwami luzatshona lukhuluma ngokulunga kwakho

ilanga lonke,

ngoba labo abafuna ukungilimaza

sebeyangisiwe basanganiswa.