Izaga 1 - Ndebele Contemporary Bible 2022

Injongo Lendikimba

1Izaga zikaSolomoni indodana kaDavida, inkosi yako-Israyeli:

2ukuba abantu bazuze ukuhlakanipha lokuzithiba;

ukuba bazwisise amazwi okuqedisisa;

3ukuba bazuze impilo yokuzithiba lobuqotho,

besenza okulungileyo, okufaneleyo lokuqondileyo;

4ukunika ulwazi kwabayizithutha,

ulwazi lokukhetha okuqondileyo kwabatsha

5ukuthi ohlakaniphileyo alalele engeze ukufunda kwakhe,

kuthi obonisisayo azuze izeluleko,

6ukuba abantu bazwisise izaga lemizekeliso,

izitsho lamalibho abahlakaniphileyo.

7Ukwesaba uThixo kuyikuqala kwenhlakanipho,

kodwa iziwula ziyakweyisa ukuqedisisa lokuzithiba.

Isandulelo: Isikhuthazo Sokubambelela ElwaziniIsixwayiso Ngokukhangwa Yizoni

8Lalela, ndodana yami, izeluleko zikayihlo

njalo ungadeli imfundiso kanyoko.

9Kuzakuba ngumqhele omuhle ekhanda lakho

lomgaxo wokucecisa intamo yakho.

10Ndodana yami, aluba izoni zikuhuga,

ungaze wavuma.

11Nxa zisithi, “Woza sihambe;

kasicathamele abantu sichithe igazi,

kasicwathele omunye umuntu ongelacala;

12kasibaginye bephila njengengcwaba,

sibajwamule njengabawele emgodini;

13sizazuza impahla ezinhle ezehlukeneyo

sigcwalise izindlu zethu ngempango;

14phathisana lathi

ukuze sibelesikhwama sinye”

15ndodana yami, ungahambi lazo,

ungalugxobi olwakho ezindleleni zazo;

16ngoba ezabo inyawo zigijima ekoneni,

bachitha igazi lula.

17Kakusizi ukuthiya ngembule

lithe dandalazi emehlweni ezinyoni!

18Abantu laba bacathamela ukuchitheka kwelabo igazi;

bajuma okwabo ukuphila.

19Sinjalo isiphetho salabo abadinga inzuzo ngobugebenga;

kuyayichitha impilo yalabo abayitholayo.

Isixwayiso Ngokufulathela Inhlakanipho

20Ukuhlakanipha kuyamemeza emgwaqweni,

kuphakamisa ilizwi lakho ezinkundleni;

21kuyanqongoloza lezindleleni okuxokozela khona,

kuyatshumayela emasangweni omuzi kuthi:

22“Koze kube nini lina zithutha lithanda ubuthutha benu na?

Koze kube nini izideleli zikholisa ukudelela

leziphukuphuku zizonda ulwazi na?

23Lalelani ukukhuza kwami liphenduke!

Ngizalivulela isifuba sami,

ngilivezele imicabango yami.

24Kodwa ngenxa yokuthi langifulathela ngilibiza,

kwangabi khona onginanzayo ngiselula isandla sami,

25njengoba lala izeluleko zami

njalo kalavuma ukukhuza kwami,

26ngakho lami ngizahleka selihlupheka;

ngizaliklolodela nxa lisehlelwa lusizi,

27nxa usizi lulehlela njengesiphepho;

nxa incithakalo ilikhukhula njengesivunguzane,

nxa usizi lezinhlupheko ziligabhela.

28Lapho-ke bazangibiza kodwa kangiyikusabela;

bazangidinga bangangitholi.

29Ngoba babeluzonda ulwazi

kabaze bakhetha ukwesaba uThixo

30ngoba kabavumanga iseluleko sami,

badelela ukukhuza kwami,

31bazakudla izithelo zokuhamba kwabo

basuthiswe ngezithelo zamacebo abo.

32Phela ubuhlongandlebe bezithutha buzazibulala,

lokungananzi kweziphukuphuku kuzazibhubhisa;

33kodwa lowo ongilalelayo uzahlala evikelekile ekhululekile,

engesabi lutho olungamlimaza.”