AmaHubo 103 - Ndebele Contemporary Bible 2022

Ihubo 103ElikaDavida.

1Dumisa uThixo, Oh mphefumulo wami;

konke okuphakathi kwami,

kakudumise ibizo lakhe elingcwele.

2Dumisa uThixo, Oh mphefumulo wami,

ungaze wakhohlwa konke okuhle okuthola kuye

3othethelelayo zonke izono zakho

akusilise kuzozonke izifo zakho,

4ohlenga impilo yakho egodini

akwethese uthando lesihawu,

5osuthisa izifiso zakho ngezinto ezinhle

ukuze ubutsha bakho buvuselelwe njengengqungqulu.

6 UThixo ubenzela ukulunga

lokwahlulela okuhle labo abancindezelweyo.

7Izindlela zakhe wazazisa uMosi,

izenzo zakhe wazazisa abantu bako-Israyeli;

8 uThixo ulesihawu njalo ulomusa,

uyaphuza ukuthukuthela, kodwa uyanda ngothando.

9Kahlali ebeka imilandu

futhi kagcini ulaka lwakhe kokuphela;

10kasiphathi ngokufanele izono zethu

kumbe asijezise ngokulingene iziphambeko zethu.

11Ngoba njengokuphakama komkhathi ngaphezu komhlaba,

lukhulu kangako uthando lwakhe kulabo abamesabayo;

12njengobukhatshana bempumalanga kuyo intshonalanga

kanjalo ususile iziphambeko zethu kithi.

13Ngendlela ubaba elozwelo ebantwaneni bakhe,

kanjalo uThixo ulozwelo kulabo abamesabayo;

14ngoba uyakwazi ukuthi sibunjwe njani,

uyakhumbula ukuthi siluthuli.

15Umuntu yena insuku zakhe zinjengotshani,

ukhula amemetheke njengembali yeganga;

16umoya uyayiphephetha ihle inyamalale,

indawo yakhe ingabe isayikhumbula lanini.

17Kodwa kusukela phakade kusiya phakade

uthando lukaThixo lukulabo abamesabayo,

lokulunga Kwakhe ebantwaneni babantwana

18kulabo abagcina isivumelwano Sakhe

njalo bakhumbule ukulalela izimiso zakhe.

19 UThixo usemisile isihlalo sakhe sobukhosi ezulwini,

njalo ubukhosi bakhe buphezu kwakho konke.

20Dumisani uThixo, lina zingilosi,

lina zinceku zakhe elenza intando yakhe,

elilalela ilizwi lakhe.

21Dumisani uThixo, lonke mabutho akhe asezulwini,

lina zinceku zakhe elenza intando yakhe.

22Dumisani uThixo, imisebenzi yakhe yonke

ezindaweni zonke embusweni wakhe.

Dumisa uThixo, Oh mphefumulo wami.