2 AbaseKhorinte 6 - Ndebele Contemporary Bible 2022

1Njengezisebenzi zikaNkulunkulu siyalincenga ukuba lingamukeli umusa kaNkulunkulu ngeze.

2Ngoba uthi:

“Ngesikhathi esifaneleyo kimi ngalizwa,

langosuku lokusindiswa ngalisiza.”

Zwanini, khathesi sekuyisikhathi esifaneleyo, khathesi lusuku lokusindiswa.

Inhlupheko ZikaPhawuli

3Kasibeki zikhubekiso endleleni yomuntu ukuze imfundiso yethu ingasolwa.

4Kodwa, njengezinceku zikaNkulunkulu sizethula ngazozonke izindlela: ngokubekezela okukhulu; ekuhluphekeni, ebunzimeni kanye lasezinsizini;

5ekutshayweni, ekuvalelweni entolongweni laseziphithiphithini; ukusebenza nzima, ukungalali ebusuku kanye lendlala;

6ukuhlambuluka, ukuqedisisa, ukubekezela kanye lomusa, ngoMoya oNgcwele langothando oluqotho,

7ngokukhuluma iqiniso langamandla kaNkulunkulu; ngezikhali zokulunga esandleni sokudla lesenxele;

8ngodumo langehlazo, ukukhulunyelwa kubi lokukhulunyelwa kuhle; siqotho, kodwa sikhangelwa njengabakhohlisi;

9siyaziwa kodwa sikhangelwa njengabangaziwayo, abafayo, kodwa siqhubeka siphila; siyatshaywa kodwa kasibulawa,

10sisosizini kodwa sihlezi sijabula; simpofu kodwa sinothisa abanengi; kasilalutho kodwa silezinto zonke.

11Sikhulume kini sikhululekile, maKhorinte, sazivula ngokupheleleyo inhliziyo zethu kini.

12Kasilugodli uthando lwethu kini kodwa lina liyalugodla olwenu kithi.

13Okungaba yikuphana okuhle, ngikhuluma njengasebantwaneni bami, lani zivuleni ngokupheleleyo inhliziyo zenu kithi.

Lingadlelani Labangakholwayo

14Lingahlanganyeli labangakholwayo. Ngoba ukulunga lobubi kulokuhambelana bani na? Loba yibudlelwano bani obungaba khona phakathi kokukhanya lobumnyama na?

15Yikuzwana bani okukhona phakathi kukaKhristu loBheliyali na? Yikuhambelana bani okholwayo alakho longakholwayo na?

16Yisivumelwano bani esikhona phakathi kwethempeli likaNkulunkulu lezithombe na? Ngoba thina silithempeli likaNkulunkulu ophilayo. Njengoba uNkulunkulu wathi:

“Ngizahlala labo

ngihambe phakathi kwabo

njalo ngizakuba nguNkulunkulu wabo

bona babengabantu bami.”

17Ngakho,

“phumani kubo

lehlukane labo,

kutsho iNkosi.

Lingathinti lutho olungcolileyo,

mina ngizalemukela.”

18Njalo,

“mina, ngizakuba nguYihlo,

lina lizakuba ngamadodana lamadodakazi ami,

kutsho iNkosi uSomandla.”