AmaHubo 31 - Ndebele Contemporary Bible 2022

Ihubo 32Kumqondisi wokuhlabela. Ihubo likaDavida.

1Kuwe Thixo, sengithole isiphephelo;

mangingayangiswa lanini;

ngihlenga ngokulunga Kwakho.

2Ngilalela,

woza ngokuphangisa ungihlenge;

woba lidwala lami lokuphephela,

inqaba eqinileyo yokungisindisa.

3Njengoba ulidwala lami lenqaba yami,

ngikhokhela ungihole ngenxa yegama Lakho.

4Ngikhulula emjibileni othiyelwe mina,

ngoba uyisiphephelo sami.

5Ezandleni Zakho nginikela umphefumulo wami;

ngihlenga, Oh Thixo, Nkulunkulu weqiniso.

6Ngiyabazonda labo abanamathela izithombe eziyize;

ngithemba kuThixo.

7Ngizathokoza ngijabule othandweni Lwakho,

ngoba wakubona ukuhlupheka kwami

wabazi ubuhlungu bomphefumulo wami.

8Kawungifuqelanga esitheni

kodwa ugxilise inyawo zami endaweni ebanzi.

9Woba lomusa kimi, Oh Thixo, ngoba ngiyahlupheka;

amehlo ami ayafiphala ngenxa yosizi,

umphefumulo wami lomzimba wami ngokudabuka.

10Impilo yami incitshiswa yikukhathazeka,

leminyaka yami yikububula;

amandla ami ayadeda ngenxa yokuhlupheka kwami,

lamathambo ami aphela amandla.

11Ngenxa yezitha zami,

sengiyinhlekisa enjani kubomakhelwane;

sengiyinhlekisa kubangane bami

labo abangibonayo ezindleleni bayangibalekela.

12Sebekhohliwe ngami kungathi sengafa;

senginjengembiza yebumba ehlephukileyo.

13Ngoba ngizwa izingoma zabanengi;

kulezisongo inxa zonke;

bakha amasu okungilimaza,

njalo baceba ukuchitha impilo yami.

14Kodwa ngiyethemba Kuwe, Thixo;

ngithi, “UnguNkulunkulu wami.”

15Izikhathi zami zisezandleni Zakho;

ngisindisa ezitheni zami

lakulabo abangizingelayo.

16Ubuso Bakho mabukhazimulele encekwini Yakho;

ngisindisa ngothando Lwakho olungehlulekiyo.

17Mangingahlaziswa, Oh Thixo,

ngoba sengikhalile Kuwe;

kodwa akuthi ababi bahlaziswe

balale bathule zwi ethuneni.

18Akuthi izindebe zabo zamanga zithuliswe,

ezikhuluma ngokuzigqaja lokweyisa

bakhuluma ngobuqholo ngabantu abalungileyo.

19Kukhulu kangakanani ukulunga Kwakho

okugcinele labo abakwesabayo,

okunika obala abantu bebona

kulabo abaphephela Kuwe.

20Uyabafihla ekusithekeni kobukhona Bakho

emaqingeni ababi

uyabagcina bevikelwe emzini wakhe

ezilimini ezichothozayo.

21Udumo alube kuThixo

ngoba watshengisa uthando lwakhe olumangalisayo kimi

ngisedolobheni elihanqiweyo yimpi.

22Ngiphakathi kokwethuka ngathi,

“Sengisusiwe kangisabonakali Kuwe!”

Kanti wakuzwa ukukhala kwami ngicela umusa,

lapho ngangicela kuwe ukusizwa.

23Mthandeni uThixo,

lina bangcwele bakhe!

UThixo uyabalondoloza abathembekileyo,

kodwa abazigqajayo uyabaphindisela ngokugcweleyo.

24Qinani lime isibindi,

lonke lina elithemba uThixo.