U-Amosi Isingeniso - Ndebele Contemporary Bible 2022
IsingenisoIsingenisoUmbuso wako-Israyeli owawungenyakatho wadlondlobala ngeminyaka yakuqala yengxenye yesentshuri yesificaminwembili uKhristu engakazalwa (2 Amakhosi 14.23-25) ngomnyaka wamatshumi amane lanye wokubusa kukaJerobhowamu wesibili owayelamandla amakhulu. Babenamile ngokunqoba kwesizwe sabo, ukukhonza kwabo, ilifa labo njalo abantu baze babalesitsho sokuthi “UNkulunkulu ulathi!” Babekhangelele usuku lukaThixo, lapho uNkulunkulu ayezachitha khona izitha zabo zonke abesefaka u-Israyeli ukuthi abe ngumbusi ongelakuphikiswa.Esimeni esinjalo sokwenama kokuzibusa kufika u-Amosi, umelusi wezimvu evelela embusweni osezansi koJuda. Nxa ethempelini elikhulu lesikhosini eBhetheli amemezele ukuba uNkulunkulu useqoqa isizwe esizanqoba u-Israyeli. Wagcizelela ukuba Usuku lukaThixo luzakuba yibumnyama hatshi ukukhanya. UNkulunkulu kathokozi ngenotho ka-Israyeli, amandla ebutho lakhe lokulandela inkanuko zabo ekuphileni kwabo. Udinga ukulunga ngesikhathi izinothi labalamandla bencindezela abayanga. UNkulunkulu ubiza u-Israyeli ukuba aphenduke okuyiyona ndlela eyodwa yokuvikela ukubhidlizwa.Umbiko lo udala ukuvungama lokungahlaliseki. U-Amaziya, umphristi omkhulu weBhetheli ucala u-Amosi ngecala lokufuna ukugenqula umbuso. U-Amosi uyaxotshwa elizweni, kodwa iziphrofethi zakhe ziyalotshwa, okwaba liqoqo lakuqala elalotshwa ngumphrofethi ongumHebheru. Ugwalo lwakhe luqukethe iziphrofethi ezitshiyeneyo ezingaba ngamatshumi amathathu alesithupha kanye lodaba lokuxotshwa kwakhe. Phose ugwalo lonke kalubuthaniswanga ngokuqinileyo kodwa luletha umbiko munye omqoka njalo oqukethe nkulumo yinye ethi: Ukwahlulela kuhle akugeleze njengomfula, lokulunga njengesiziba esingacitshiyo!
