UJeremiya 48 - Ndebele Contemporary Bible 2022

Ilizwi NgeMowabi

1Mayelana leMowabi:

UThixo uSomandla, uNkulunkulu ka-Israyeli uthi:

“Maye kuyo iNebho ngoba izachithwa.

IKhiriyathayimi izayangeka njalo ithunjwe;

inqaba izayangeka ibhidlizwe.

2IMowabi kayiyikudunyiswa futhi;

eHeshibhoni abantu bazaceba ukumbhidliza:

besithi, ‘Wozani sitshabalalise isizwe lesiyana.’

Lawe, wena Madimeni uzathuliswa;

inkemba izaxotshana lawe.

3Zwanini ukukhala okuvela eHoronayimi;

ukukhala komonakalo omkhulu lencithakalo.

4IMowabi izachitheka;

abancinyane bayo bazakhala.

5Baqansa ngendlela eya eLuhithi,

bahamba belila kabuhlungu,

emgwaqweni owehlela eHoronayimi,

kuzwakala ukukhala okulosizi ngenxa yokuchitheka.

6Balekani! Gijimani lizivikele ekufeni;

wobani njengesihlahla enkangala.

7Njengoba lithembe izenzo zenu lenotho yenu,

lani futhi lizathunjwa,

loKhemoshi uzakuya ekuthunjweni,

kanye labaphristi bakhe lezikhulu zakhe.

8Umchithi uzafika emadolobheni wonke,

njalo akukho dolobho elizaphepha.

Isigodi sizatshabalaliswa,

lamagceke azaqothulwa

ngoba uThixo usekhulumile.

9Fakani itswayi kuyo iMowabi

ngoba izachitheka;

amadolobho ayo azakuba ngamanxiwa

angayikuba lamuntu ozahlala kuwo.

10Yeka isithuko kulowo oyekethisayo ekwenzeni umsebenzi kaThixo!

Yeka isithuko kulowo ogodla inkemba yakhe ekuchitheni igazi!

11IMowabi ibiphumule kusukela ebutsheni bayo

njengewayini elisele phezu kwezinsipho zalo,

elingathelwanga kwenye imbiza lisuswa kwenye

kayithunjwanga.

Ngakho inambitheka njengakuqala,

iphunga layo kaliguqukanga.

12Kodwa insuku ziyeza,

lapho ngizathuma abantu abathulula okusembizeni,

njalo bazayithululela phandle;

bazachitha okusezimbizeni zayo

bazimahlaze imbiza zayo.

13Lapho-ke iMowabi izayangeka ngoKhemoshi

njengokuyangeka kwendlu ka-Israyeli

lapho babethembe iBhetheli.

14Lingatsho kanjani na ukuthi, ‘Singamabutho,

amadoda alesibindi empini na’?

15IMowabi izachithwa, amadolobho ayo ahlaselwe;

amajaha ayo aqinileyo azacakazelwa phansi abulawe,”

kutsho iNkosi, obizo layo nguThixo uSomandla.

16“Ukuwa kweMowabi sekuseduze;

umonakalo wayo uzafika ngokuphangisa.

17Ikhaleleni lonke lina elakhelene layo,

bonke abalwaziyo udumo lwayo,

lithi, ‘Yeka ukwephuka kwentonga yobukhosi elamandla,

yeka ukwephuka kodondolo oluhle kakhulu!’

18Yehlani ebukhosini benu

lihlale emhlabathini owomileyo,

lina elihlala eNdodakazini yaseDibhoni.

Ngoba lowo ochitha iMowabi

uzakuzalihlasela

adilize amadolobho enu avikelweyo.

19Manini emgwaqweni lilinde,

lina elihlala e-Aroweri.

Buzani indoda ebalekayo lowesifazane obalekayo;

babuzeni lithi, ‘Kwenzakaleni na?’

20IMowabi iyangekile, ngoba ichithekile.

Lilani likhale!

Bikani ngase-Arinoni

ukuthi iMowabi itshabalalisiwe.

21Ukwehlulela sekufikile emagcekeni

eHoloni, leJahazi laseMefahathi,

22eDibhoni, leNebho laseBhethi-Dibhilathayimi,

23eKhiriyathayimi, leBhethi-Gamuli laseBhethi Meyoni,

24eKheriyothi kanye laseBhozira

kuwo wonke amadolobho aseMowabi, aseduze lakhatshana.

25Uphondo lweMowabi luqunyiwe,

ingalo yalo yephuliwe,”

kutsho uThixo.

26“Idakiseni

ngoba idelele uThixo.

IMowabi kayizibhixe ngamahlanzo ayo;

kayibe yinto yokuhlekwa.

27U-Israyeli wayengasinto yokuhlekisa kuwe na?

Watholakala ephakathi kwamasela na,

ukuba unikine ikhanda lakho ngokweyisa

ngasosonke isikhathi lapho ukhuluma ngaye?

28Tshiyani amadolobho enu lihlale emadwaleni,

lina elihlala eMowabi.

Wobani njengejuba elakhela isidleke salo

emlonyeni wobhalu.

29Sizwile ngokuzigqaja kweMowabi,

ukuziqakisa kwayo lokuzazisa kwayo!

Ukuzigqaja lokuzikhukhumeza kwayo,

kanye lokuziphakamisa kwenhliziyo yayo.

30Ngiyakwazi ukudelela kwayo, kodwa kuyize,

lokuzincoma kwayo akusizi lutho,” kutsho uThixo

31“Ngakho-ke ngiyalila ngeMowabi,

ngikhalela iMowabi yonke,

ngililela abantu baseKhiri-Haresethi.

32Ngiyalikhalela njengokulila kweJazeri,

lina zivini zaseSibhima.

Ingatsha zenu zinaba zifike olwandle,

zafika olwandle lwaseJazeri.

Umchithi usehlele

phezu kwezithelo zakho ezivuthiweyo laphezu kwamavini.

33Ukuthokoza lokuthaba akusekho

ezivinini lasemasimini eMowabi.

Ukugeleza kwewayini ezikhamelweni sengikumisile;

kakho ozalikhama eklabalala ngentokozo.

Lanxa kulokuklabalala

akusikuklabalala kwentokozo.

34Umsindo wokukhala kwabo uyaphakama

uvelela eHeshibhoni usiya e-Eliyale laseJahazi,

uvela eZowari usiyafika eHoronayimi le-Egilathi Shelishiya,

ngoba lamanzi aseNimirimi asecitshile.

35EMowabi ngizabaqeda

labo abanikela iminikelo ezindaweni eziphakemeyo

batshisele labonkulunkulu babo impepha,” kutsho uThixo.

36“Ngakho inhliziyo yami ikhalela iMowabi njengemfegwana;

iyakhala njengemfegwana ikhalela abantu beKhiri-Haresethi.

Inotho ababeyizuzile kayisekho.

37Amakhanda wonke aphuciwe

lezindevu zonke zigeliwe;

izandla zonke zisikiwe

lezinkalo zonke zigqokiswe amasaka.

38Phezu kwezimpahla zonke zezindlu zaseMowabi

lasemagcekeni kazulu,

akulalutho ngaphandle kokukhala,

ngoba iMowabi ngiyibulele

njengembiza engafunwa muntu,” kutsho uThixo.

39“Yeka ukuphahlazwa kwayo! Yeka ukulila kwabo!

Yeka ukufulathela kweMowabi ilehlazo!

IMowabi isibe yinto yokuhlekwa;

into yokwesatshwa yibo bonke abakhelane layo.”

40 UThixo uthi:

“Khangela! Ukhozi lwehlela phansi ngesiqubu,

lwelulele impiko zalo phezu kweMowabi.

41IKheriyothi izathunjwa,

lezinqaba zithunjwe.

Ngalolosuku inhliziyo zamabutho aseMowabi

zizakuba njengenhliziyo yowesifazane ohelelwayo.

42IMowabi izachithwa ingabe isaba yisizwe

ngoba yadelela uThixo.

43Ukwesaba lomgodi kanye lomjibila kulilindele

lina bantu baseMowabi,”

kutsho uThixo.

44“Loba ngubani obalekela ukwesaba

uzawela emgodini,

loba ngubani ophuma emgodini

uzabanjwa ngumjibila;

ngoba ngizakwehlisela phezu kweMowabi

umnyaka wokujeziswa kwayo,”

kutsho uThixo.

45“Emthunzini waseHeshibhoni

ababalekayo bayema kungelasizo,

ngoba umlilo usuphumile eHeshibhoni,

ilangabi elivela phakathi kwakoSihoni;

litshisa amabunzi eMowabi

inkakhayi zamaqhalaqhala alomsindo.

46Maye kuwe! wena Mowabi!

Abantu baseKhemoshi babhujisiwe;

amadodana athunjiwe

lamadodakazi akho athunjiwe.

47Kodwa inhlanhla ye-Mowabi ngizayibuyisela

ensukwini ezizayo,”

kutsho uThixo.

Ukwahlulelwa kweMowabi kuphelela lapha.