1Ngilamulela, Oh Thixo, ebantwini ababi;
ngivikela ebantwini bodlakela,
2abakha amacebo amabi ezinhliziyweni zabo
bahlokomise impi ukusa kwamalanga.
3Benza izindimi zabo zicije njengezenyoka;
ubuhlungu benhlangwana busezindebeni zabo.
4Ngivikela, Oh Thixo, ezandleni zababi;
ngiphephisa ebantwini bodlakela
abaceba ukungigwenxa.
5Abantu abazigqajayo bangifihlele isifu;
sebewanwebile amambule abo
bangithiya lapha lalapha endleleni yami.
6Oh Thixo, ngithi kuwe, “UnguNkulunkulu wami.”
Zwana, ukukhala kwami ngicela umusa.
7Oh Thixo wobukhosi, mhlengi wami olamandla,
ovikela ikhanda lami ngelanga lempi
8ungavumeli ababi izifiso zabo Oh Thixo;
ungayekeli amacebo abo ukuthi aphumelele, funa bazigqaje.
9Akuthi ingqondo zalabo abangihanqileyo
zandelwe luhlupho oludalwe yizindebe zabo.
10Akuthi amalahle avuthayo abakhithikele;
sengathi bangaphoselwa emlilweni,
emigodini ebhixa udaka, bangavuki futhi.
11Akuthi abahlebayo bangatholi indawo elizweni;
akuthi umnyama ubahlale izithende abantu bochuku.
12Ngiyazi ukuthi uThixo ubenzela okulungileyo abayanga,
ubamele abaswelayo.
13Ngempela abalungileyo bazalidumisa ibizo lakho
labaqotho bazahlala phambi kwakho.
Who We AreWhat We EelieveWhat We Do
2025 by iamachristian.org,Inc All rights reserved.
