Izaga Isingeniso - Ndebele Contemporary Bible 2022
IsingenisoIsingenisoU-Israyeli wayezwisisa ukuthi uMdali wayefake izinto emhlabeni wakhe ukuze afunde kuzo. Ugwalo lweZaga luveza lezozifundo ngezitsho ezimfitshane ezingaphangi zikhohlakale ezakhulunywa zingcitshi zabo. Ezinengi zakhona zabhalwa nguSolomoni, inkosi eyazakala ngokuhlakanipha okumangalisayo (bona 1 Amakhosi 4.29-34). Izaga lezi zenzelwa ukulaya abasakhulayo ukuze bangenzi amaphutha, ukwenzela ukuthi bafunde indlela ezibalulekileyo zokuthola inhlalakahle, impilakahle lokuvikeleka.Ngemva kokufundisa kancane ngenhlakanipho ngokwayo, efananiswa lowesifazane iyabakhuthaza ukuthi bakhule elwazini. Isigaba lesi siphetha ngamadili amabili, elinye lingelikaNhlakanipho elinye lingelikaBuphukuphuku. Amadili la atshengisa ukuthi umuntu kumele akhethe kuhle empilweni. Ngemva kwalokho kulandela izaga zikaSolomoni ezingamakhulu amathathu lamatshumi ayisikhombisa lanhlanu, lokhu kuveza isitsho sebizo lakhe ngamanani esiHebheru. (Imisindo yamabala esiHebheru yayisetshenziswa njengamanani, ngakho-ke amabala ayeqakatheke okufana lobunengi bemisindo yamabala awo). Ngemva kwezinye izitsho zengcitshi kulandela ezinye njalo ezabuthaniswa ngamadoda kaHezekhiya inkosi yakoJuda. Izitsho lezi zilikhulu elilodwa lamatshumi amathathu, inani elilingana lebizo likaHezekhiya. Ugwalo lwezaga luphela ngezitsho zika-Aga loLemuweli eziphela ngenkondlo elezigaba ezingamatshumi amabili lambili. Isigaba sinye ngasinye siqala ngesiqu samagama esiHebheru ngokulandelana kwazo. Konke okuhle, okukhonzekayo esimilweni somuntu kutshengiswa lapho besipha isimo senkosikazi epheleleyo.Ugwalo lolu lwezitsho ezimfitshane ezimumethe inhlakanipho lulenhloso eyodwa nje eyokufundisa ukuthi Ukwesaba uThixo yikuqala kolwazi.
