U-Isaya 47 - Ndebele Contemporary Bible 2022

Ukuwa KweBhabhiloni

1“Yehla uhlale othulini

Ndodakazi emsulwa yaseBhabhiloni,

hlala emhlabathini ungelasihlalo sobukhosi,

ndodakazi yamaBhabhiloni.

Akusayikuthiwa

ubuthakathaka loba kuthiwe uthambile.

2Thatha amatshe okuchola uchole impuphu;

ukhuphe isimbombozo sakho.

Phakamisa izidwaba zakho, uveze imilenze yakho,

ugxabhaze udabule ezifuleni.

3Ubunqunu bakho buzavezwa,

ihlazo lakho lambuleke.

Ngizaphindisela,

kakho engizamyekela.”

4Umhlengi wethu uThixo uSomandla libizo lakhe

ungoNgcwele ka-Israyeli.

5“Hlala ngokuthula, yana emnyameni,

ndodakazi yamaKhaladiya;

awuyikubizwa ngokuthi

ndlovukazi yemibuso futhi.

6Ngabathukuthelela abantu bami,

ngangcolisa ilifa lami,

ngabanikela ezandleni zakho,

kawaze waba lesihawu kubo.

Lasebeluphele,

wabethesa ijogwe elinzima.

7Wathi, ‘Ngizaqhubeka kokuphela

ngiyindlovukazi nini lanini.’

Kodwa kawuzinakanga lezizinto,

kumbe unakane ngokungenzakala.

8Khathesi-ke lalela, wena sidalwa esingazibekanga,

wena ocambaleleyo uvikelekile

usithi ngenhliziyo yakho,

‘Mina yimi, njalo kakho omunye ngaphandle kwami,

angisoze ngaba ngumfelokazi

kumbe ngifelwe ngabantwana.’

9Kodwa lokhu kokubili kuzakwehlela

ngokuphangisa, ngasuku lunye

ukufelwa ngabantwana lobufelokazi.

Lokhu kuzakwehlela phezu kwakho ngokugcweleyo,

bungakhathelekile ubuthakathi bakho

layo yonke imilingo yakho elamandla.

10Wethembele ebubini bakho,

njalo watsho wathi, ‘Kakho ongibonayo.’

Inhlakanipho yakho lolwazi lwakho kuyakukhohlisa

lapho usithi kuwe,

‘Mina yimi, njalo kakho omunye ngaphandle kwami.’

11Incithakalo izakwehlela phezu kwakho,

njalo awuyikwazi ukuyivikela ngemilingo.

Umonakalo uzakwehlela phezu kwakho,

ongeke uwuvimbe ngenhlawulo,

lengozi ongeke uyikhumbulele

izakujuma.

12Qhubeka-ke ngemilingo yakho,

langobuthakathi bakho obunengi

okusebenza kusukela ebantwaneni bakho.

Mhlawumbe uzaphumelela,

kumbe njalo wenze kube lokwesaba.

13Zonke izeluleko owazitholayo zikucobile.

Izazi zezinkanyezi kazisondele,

labahloli bezinkanyezi ababika ngokuzakwenzakala inyanga ngenyanga.

Kabakuhlenge kulokhu okuzakwehlela.

14Impela banjengamahlanga;

umlilo uzabatshisa futhi

bangeke bazihlenga

emandleni amalangabi.

Lapha akulamalahle okothiwa ngumuntu;

lapha akulamlilo wokotha.

15Lokho yikho abangakwenzela khona

labo owasebenza labo,

uthengiselana labo kusukela ebuntwaneni.

Omunye lomunye wabo uyaqhubeka ngesiphosiso sakhe;

kakho ongakusindisa.”