U-Isaya 12 - Ndebele Contemporary Bible 2022

Izingoma Zokubonga

1Ngalolosuku wena uzakuthi:

“Ngizakubonga Oh Thixo.

Lanxa wawungithukuthelele

ulaka lwakho seluphelile,

njalo usungiduduzile.

2Ngeqiniso uNkulunkulu uyinsindiso yami;

ngizathemba ngingesabi.

UThixo, uThixo ngokwakhe ungamandla lengoma yami;

usebe yinsindiso yami.”

3Ngentokozo uzakukha amanzi

emithonjeni yensindiso.

4Ngalolosuku uzakuthi:

“Mbongeni uThixo, bizani ibizo lakhe,

zaziseni izizwe ngalokhu akwenzileyo,

limemezele ukuthi ibizo lakhe liphakeme.

5Hlabelelani kuThixo, ngoba wenze izinto ezinhle kakhulu;

lokhu kwenzeni kwazakale emhlabeni wonke.

6Memezani kakhulu lihlabele ngokuthokoza, bantu baseZiyoni,

ngoba mkhulu oNgcwele ka-Israyeli phakathi kwenu.”