UHosiya 10 - Ndebele Contemporary Bible 2022

1U-Israyeli wayelivini eliqhelayo,

wazizalela izithelo.

Ngokwanda kwezithelo zakhe

wakha ama-alithare amanengi;

kwathi ngokuphumelela kwelizwe lakhe

wahlobisa amatshe akhe akhonzwayo.

2Inhliziyo zabo ziyakhohlisa,

khathesi kufanele bathwale icala labo.

UThixo uzawabhidliza ama-alithare abo,

uwachithile lamatshe abo, akhonzwayo.

3Ngakho bazakuthi, “Thina kasilankosi

ngoba kasimhloniphanga uThixo.

Kodwa loba sasingaba lenkosi,

kuyini eyayingasenzela khona?”

4Benza izithembiso ezinengi,

bafunge izifungo zamanga,

benze lezivumelwano;

ngakho amacala ayanda

njengokhula olubulalayo ensimini elinyiweyo.

5Abantu abahlala eSamariya bayesaba

ngenxa yesithombe sethole saseBhethi-Aveni.

Abantu bakhona bazasililela

benzenjalo labaphristi bakhona abakhonza izithombe,

labo abathokozela ubuhle baso

ngoba sithethwe kubo ekuthunjweni.

6Sizathwalelwa e-Asiriya

njengomthelo enkosini enkulu.

U-Efrayimi uzayangeka;

u-Israyeli uzakuba lenhloni ngezithombe zakhe zezigodo.

7ISamariya lenkosi yakhona kuzabhujiswa

kuzakhukhulwa kuhambe njengogatshanyana phezu kwamanzi.

8Izindawo zokukhonzela zobuxhwali zizachithwa,

kuyisono sika-Israyeli.

Ameva lokhula kuzakhula

kwembese ama-alithare abo.

Lapho-ke bazakuthi ezintabeni, “Sembeseni!”

Lakuwo amaqaqa bathi, “Welani phezu kwethu!”

9“Kusukela ensukwini zaseGibhiya wenze isono, we Israyeli,

njalo ulokhu usele khonapho.

Kanje impi kayibaficanga yini

abenza okubi eGibhiya?

10Lapho sengifuna, ngizabajezisa;

izizwe zizaqoqanela ukumelana labo

ukuba zibabophele isono sabo esiphindiweyo.

11U-Efrayimi ulithokazi elifundisiweyo

elithanda ukubhula amabele;

ngakho ngizagaxa ijogwe

entanyeni yakhe enhle.

U-Efrayimi ngizamtshayela,

uJuda kumele alime

uJakhobe kumele abulale amagade.

12Zihlanyeleleni ukulunga,

vunani isithelo sothando olungapheliyo,

liqeqebule lomhlabathi wenu ongalinywanga; ngoba

kuyisikhathi sokudinga uThixo,

aze abuye

athele ukulunga phezu kwenu.

13Kodwa lina lihlanyele ukuxhwala,

livune ububi,

lidle isithelo senkohliso.

Njengoba lithembe amandla enu

lamabutho enu amanengi,

14ukuhlokoma kwempi kuzakuba khona ebantwini bakini,

ngakho zonke izinqaba zenu zizabhidlizwa

njengalokhu uShalimani wabhidliza iBhethi-Abheli ngosuku lwempi,

lapho onina basakazelwa phansi labantwababo.

15Kuzakwenzakala kanjalo lakuwe, wena Bhetheli,

ngoba ukuxhwala kwakho kukhulu.

Lapho lolosuku lusisa,

inkosi yako-Israyeli izachithwa okupheleleyo.”