UHosiya 6 - Ndebele Contemporary Bible 2022

U-Israyeli Kaphenduki

1“Wozani sibuyele kuThixo.

Usesidabule saba yizicucu

kodwa uzaselapha;

usilimazile

kodwa uzawabopha amanxeba ethu.

2Emva kwensuku ezimbili uzasivuselela;

ngosuku lwesithathu uzasibuyisela

ukuze sihlale lapho akhona.

3Kasimamukeleni uThixo;

kasiqiniseni ukumamukela.

Ngoqotho njengoba ilanga liphuma,

uzabonakala;

uzakuza kithi njengezulu lebusika,

lanjengezulu lentwasa elithambisa umhlaba.”

4“Ngingenzani ngawe, Efrayimi na?

Ngingenzani ngawe, Juda na?

Uthando lwenu lunjengenkungu yekuseni,

lunjengamazolo ekuseni anyamalalayo.

5Ngakho ngaliqumaquma ngabaphrofethi bami,

ngalibulala ngamazwi omlomo wami;

ukwahlulela kwami kwaphazima njengombane phezu kwenu.

6Ngoba mina ngifuna isihawu, hatshi umhlatshelo,

lokwamukela uNkulunkulu kuleminikelo yokutshiswa.

7Njengo-Adamu, sebesephule isivumelwano

babengathembekanga khonale.

8IGiliyadi lidolobho labantu abaxhwalileyo.

Lingcolile ngezinyathelo zegazi

9Njengezigebenga zicathamela umuntu,

zenzanjalo izigangi zabaphristi;

zibulala abantu emgwaqweni oya eShekhemu

zisenza izinto ezimbi.

10Sengibone into etshaqisayo endlini ka-Israyeli.

U-Efrayimi uwela khonapho,

lo-Israyeli ungcolisiwe.

11Lakuwe futhi Juda,

ukuvuna sekulungiselwe.

Lapho ngingabuyisela inotho yabantu bami.