U-Isaya 11 - Ndebele Contemporary Bible 2022

UGatsha Oluvela KuJese

1Ihlumela lizavela esidindini sikaJese;

uGatsha oluhlume empandeni zakhe luzathela izithelo.

2UMoya kaThixo uzakuba phezu kwakhe,

uMoya wokuhlakanipha lowokuqedisisa,

uMoya wokweluleka lowamandla,

uMoya wokwazi lowokwesaba uThixo,

3njalo uzathokoziswa yikwesaba uThixo.

Kayikwahlulela ngalokho akubona ngamehlo akhe,

loba aqume ngalokho akuzwa ngendlebe zakhe;

4kodwa abaswelayo uzabehlulela ngokulunga

athathe izinqumo ngabayanga basemhlabeni ngokulunga.

Uzatshaya umhlaba ngentonga yomlomo wakhe;

ngomoya wendebe zakhe uzabulala ababi.

5Ukulunga kuzakuba libhanti lakhe,

ukwethembeka kube luzwezwe ekhalweni lwakhe.

6Impisi izahlala lezinyane lemvu,

ingwe izalala phansi lembuzi,

ithole kanye lesilwane kudle ndawonye;

umntwana omncane akukhokhele.

7Inkomokazi izakudla lebhele,

amankonyane akho alale ndawonye;

njalo isilwane sizakudla utshani njengenkabi.

8Usane luzadlalela phansi komlindi webululu,

umntwana omncane angenise isandla sakhe

emlonyeni womlindi wenhlangwana.

9Abayikulimaza loba badilize

kuyo yonke intaba yami engcwele,

ngoba umhlaba uzagcwala ngolwazi lukaThixo

njengamanzi egcwalisa ulwandle.

10Ngalolosuku iMpande kaJese izakuma njengophawu ebantwini; izizwe zizabuthana kuye, indawo yakhe yokuphumula izakuba lodumo.

11Ngalolosuku uThixo uzakwelula isandla sakhe okwesibili ukuba abuyise insalela zabantu bakhe abasala e-Asiriya, eGibhithe, ePhathrosi, eTiyopiya, eKhushi, e-Elamu, eShinari, eHamathi lasezihlengeni zolwandle.

12Uzaphakamisela izizwe uphawu

aqoqe abaxotshwayo ko-Israyeli.

Uzahlanganisa abantu bakoJuda abahlakazekileyo

bevela emagumbini amane omhlaba.

13Ubukhwele buka-Efrayimi buzaphela,

izitha zikaJuda zizaqunywa;

u-Efrayimi akayikukhwelezela uJuda,

kumbe uJuda abe lobutha ku-Efrayimi.

14Bazahwitha phansi emithezukweni yaseFilistiya ngasentshonalanga;

bebonke bazaphanga abantu basempumalanga.

Bazanqoba i-Edomi leMowabi lama-Amoni

azakuba ngaphansi kwabo.

15 UThixo uzacitsha

umsele wolwandle lwaseGibhithe,

ngomoya otshisayo uzadlulisa isandla sakhe

phezu komfula uYufrathe.

Uzawahlukanisa ube yizifula eziyisikhombisa

ukuze abantu bawuchaphe befake amanyathelo.

16Kuzakuba lomgwaqo omkhulu wezinsalela zabantu bakhe

abasele e-Asiriya,

njengoba kwakunjalo ko-Israyeli

ekubuyeni kwabo bevela eGibhithe.