UJobe 5 - Ndebele Contemporary Bible 2022

U-Elifazi Uqhubeka Ekhuluma

1“Memeza nxa uthanda, kodwa ngubani ozakuphendula na?

Uzaphendukela kuwuphi wabangcwele na?

2Ukucaphuka kuyasibulala isiwula

lomhawu uyamqeda oyisithutha.

3Mina ngokwami sengasibona isiwula siphumelela,

kodwa masinyane nje indlu yaso yayisiqalekisiwe.

4Abantwabaso kabavikelekanga lakancinyane,

baphoselwa entolongweni bengelamvikeli.

5Abalambileyo bayazidlela isivuno sakhe,

besithatha kanye lasemeveni,

labomileyo bahahabela inotho yakhe.

6Ngoba ubunzima kabugobhozi emhlabathini,

loba uhlupho luhlume phansi.

7Kodwa umuntu uzalelwa ukuhlupheka

njengoba ngeqiniso inhlansi zomlilo ziqhatshela phezulu.

8Kodwa aluba ubuyimi, bengizamncenga uNkulunkulu;

bengizakwethula udubo lwami kuye.

9Uyazenza izimanga ezingelakulinganiswa,

imimangaliso engelakubalwa.

10Uyanisa izulu emhlabeni;

uthumela amanzi elizweni.

11Abaphansi uyabakhweza phezulu,

lalabo abakhalayo ubaphakamisela ekuphepheni.

12Uyawafubisa amacebo amaqili,

ukuze izandla zawo zingaphumeleli.

13Uyababamba abahlakaniphileyo ebuqilini babo,

kuthi amaqhinga eziphoxo achitheke.

14Ubumnyama buyabehlela emini;

phakathi kwemini bayaphumputha kungathi kusebusuku.

15Uyabasindisa abaswelayo baphephe inkemba emlonyeni wabo;

uyabasindisa ekubanjweni ngabalamandla.

16Ngakho abayanga balalo ithemba,

ukwahlulela kubi kuvala owakho umlomo.

17Ubusisiwe umuntu oqondiswa nguNkulunkulu;

ngakho ungaseyisi isijeziso sikaSomandla.

18Ngoba uyagwaza, kodwa aphinde abophe amanxeba;

uyalimaza kodwa izandla zakhe njalo ziyapholisa.

19Uzakuhlenga ezinhluphekweni eziyisithupha;

kweziyisikhombisa kawuyikuwelwa yingozi.

20Ngesikhathi sendlala uzakuhlenga ekufeni,

lasempini akuhlenge ekugaleleni kwenkemba.

21Uzavikelwa ekuhletshweni,

ungaze wesaba nxa kufika incithakalo.

22Uzakuhleka ukuchithakala kanye lendlala,

njalo ungaze wazesaba izilo zomhlaba.

23Ngoba uzakuba lesivumelwano lamatshe eganga,

lezinyamazana zeganga zizahlalisana kuhle lawe.

24Uzakwazi ukuthi ithente lakho livikelekile;

uzahlolisisa impahla yakho uthole kungelalutho olungekho.

25Uzakwazi ukuthi abantwabakho bazakuba banengi,

lesizukulwane sakho sibe ngangotshani bomhlaba.

26Uzakuza engcwabeni usukhulile okugcweleyo

njengezikhwebu zamabele eziqoqwa seziphelele.

27Sesikuhlolile lokhu, kuliqiniso.

Ngakho kuzwisise, ukulandele wena ngokwakho.”