1 USamuyeli Isingeniso - Ndebele Contemporary Bible 2022
IsingenisoIsingenisoIngwalo ezaziwa ngokuthi ugwalo lwakuqala lolwesibili lukaSamuyeli kanye logwalo lwakuqala lolwesibili lwamaKhosi zingwalo ezinde ngokufanayo. (Ehlukaniswa ngenxa yobude yemiqulu yasendulo). Kuqala ngoSamuyeli, yena owayengumahluleli wokucina, lolugwalo luchasisa okwenzakalayo ngensuku kubusa amakhosi okuqala ayebusa ilizwe lonke kanye lalapho sekudatshulwe phakathi izizwe zako-Israyeli lezakoJuda. Ukubusa kukaSawuli loDavida kuchasiswe kabanzi. Ukumiswa kwalolugwalo kusichazela ukuthi inkosi yayiqala ukubusa ileminyaka emingaki, ngaphi lokuthi yayibusa isikhathi esingakanani, ilesimilo esinjani njalo lalokho okungabe kuqakathekile okwenzakala ngesikhathi sokubusa kwayo. (Abanye balibiza ngokuthi “Lugwalo lokuBusa.”)Ngaphansi kwendlela yokulandelana kwembali, sikhona kodwa isigqi esibonakalayo. USawuli, inkosi yakuqala ayilandeli uNkulunkulu ngokuthembeka, ngokunjalo uNkulunkulu unika isimemezelo sokuthi uzadinga indoda emthanda ngenhliziyo yayo yonke ezafanele ibuse ilizwe lako-Israyeli. UNkulunkulu uthola uDavida enguye ofaneleyo. UNkulunkulu umfaka esihlalweni sobukhosi, emthembisa ukuthi izizukulwane zakhe zizahlala zibusa nxa zingaqhubeka zimkhonza. Amakhosi abusa ngemva kukaDavida awazinikeli ekulandeleni izimiso zikaNkulunkulu. Inengi labo latshiya ukukhonza uNkulunkulu njalo layenga abantu abanengi ukuthi benze okufanayo, kodwa bakhona abalutshwana abaguqula abantu ukuthi baphendukele ekukholweni. Kusetshenziswa ukuzinikela kukaDavida ngenhliziyo yakhe kuNkulunkulu njengesilinganiso, ugwalo lukaSamuyeli kusiya kolwamaKhosi lulonda ukudangala kwabantu ekuzinikeleni kuNkulunkulu. Ukwehluleka ukulandezela isivumelwano kubangela ukuthi behlukaniswe njengesizwe, ngokuya kwesikhathi banqotshwa yizizwe zempumalanga ezilamandla.“Ugwalo lokuBusa” ngokunjalo luyimbangalusizi ephetha imbali yesivumelwano eyaqala encwadini kaGenesisi. Njengokuxotshwa kwabantu bakuqala nguNkulunkulu esivandeni, khathesi u-Israyeli uxotshwa “e-Edeni elitsha” leyo uNkulunkulu ayehlose ukubapha njengokutsho kwakhe elizweni lesithembiso. Umhlabathi lethempeli kwalahleka ekuthonisweni, isibane yiso sodwa esiseleyo. Injongo ejulileyo kaNkulunkulu ku-Israyeli yikuletha izibusiso kanye lokubuyiselwa ezizweni kodwa lokho akusagcwalisekanga. Kodwa ithemba lilokhu likhona esithembisweni sikaNkulunkulu sokuletha isizukulwane sikaDavida ukuthi sizebusa.
